АҚШ билігі елге визасыз кіруді жоспарлаған шетелдіктердің әлеуметтік желілері мен жеке деректерін тексеруді қолға алады. Бұл туралы осы елдің шекара-кеден қызметі хабарлады.
АҚШ-қа визасыз кіре алатын 42 елдің азаматтары – Ұлыбритания, Франция, Германия, Оңтүстік Корея және басқа мемлекеттерден келген туристер соңғы бес жылдағы онлайн белсенділігі туралы мәліметті міндетті түрде көрсетуге тиіс. Қазір ESTA жүйесі арқылы кіруге өтініш беруге тек байланыс деректері мен 40 доллар көлемінде төлем жасау жеткілікті болса, жаңа бастама талаптар тізімін айтарлықтай кеңейтуді көздейді.
Құжат жобасына сәйкес, өтініш берушілерден он жылдағы электронды пошта мекенжайы, отбасы мүшелері туралы толық ақпарат және соңғы бес жылдағы әлеуметтік желідегі аккаунттар тізімі сұралуы мүмкін.
Шекара қызметі аталған тексеріс қауіпсіздікті күшейтіп, елге кіруге қатысты тәуекелдерді дәлірек бағалауға мүмкіндік береді деп есептейді.
фото: freepik.com
