Атырау облысының прокуратурасы футбол клубының бюджет қаражатын тиімсіз жұмсалғанын анықтап, көптеген заң бұзушылықтарды әшкереледі.
2023 жылы клуб 500 мың еуроға шетелден футболшы алдыртуға ұйғарған. Бірақ осы қаржының 420 мың еуросы белгісіз делдалға аударылған. 2024 жылдың желтоқсанында Қазақстан футбол федерациясынан бөлінген 65 млн теңгенің 20,4 млн теңгесі тиімсіз жұмсалған, 30 млн теңгенің тауары жеткізілмеген.
Бұдан бөлек клуб сенімгерлік басқару келісімін бұзып, 662,7 млн теңгенің 132,5 млн теңгесін бюджетке аудармаған. Ойыншылар мен бапкерлердің жалақысы белгіленген шектен артық төленген, ал жабдықтар нарықтағы бағадан бірнеше есе қымбат сатып алынған.
Прокуратура клубтың белгіленген міндеттеме бойынша төмен нәтиже көрсеткенін сынға алды. 2021 жылы командада 16 жергілікті ойыншы болса, 2024 жылы бұл көрсеткіш 5-ке дейін қысқарған, ал шетелдік ойыншылар саны 12-ге жеткен.
Тексеріс қорытындысы бойынша кінәлі тұлғаларды жауапкершілікке тарту ұсынылды. Сонымен қатар, клубты мемлекет меншігіне беру, заңсыз жұмсалған қаражатты кері қайтару және жергілікті спортшыларды дамытуға басымдық беру мәселесі қарастырылып жатыр.
Осыған дейін «Жетісу» футбол клубының директорына 31,9 млн теңге жымқырды деген айып тағылды.
Осыған дейін «Жетісу» футбол клубының директоры 31,9 млн теңге жымқырды деп күдікке ілінген болатын.
Сурет: kpl.kz
