Қазақстанда наурыз айындағы үш күнде көші-қон заңнамасын бұзған 10 мыңға жуық адам анықталды. Бұл туралы ҚР Ішкі істер министрлігінің (ІІМ) Көші-қон қызметі комитетінің төрағасы Аслан Аталықов мәлімдеді.
Төрағаның айтуынша, заң бұзған шетелдіктердің 4 500-і елде болу мерзімін бұзған, ал 2 500-і заңсыз еңбек қызметімен айналысқан.
«Оның ішінде 60 заңсыз такси жүргізушісі бар. Атап кетсек, бұған дейін жүргізілген арнайы операция кезінде 700-ге жуық заңсыз такси жүргізушісі анықталған болатын. 1240 шетелдік сот шешімімен елден шығарылып, оларға бес жылға Қазақстанға кіруге тыйым салынды. Заң бұзушылардың басым бөлігі жақын шет мемлекеттен келгендер. Бірақ одан бөлек Бангладеш, Египет, Италия, Нигерия және Мадагаскар азаматтары да анықталды. Іздеуде жүрген 20 шетелдік ұсталды», — деді ІІМ көші-қон қызметі комитетінің төрағасы Аслан Аталықов.
Шетел азаматтарының келгені туралы полицияға хабарламаған 2 200 жұмыс берушіге 12 миллион теңге көлемінде айыппұл салынды. Сондай-ақ, Қазақстандағы 500 жұмыс берушіге шетелдіктерді заңсыз жұмысқа тартқаны үшін 33 миллион теңге айыппұл төлеуге міндеттеді. Олардың ішінде бес адам бұрын да осындай заң бұзушылыққа жол берген. Қазіргі таңда аталған азаматтарға қатысты ҚР Қылмыстық кодексінің 395-бабы («Шетелдік жұмыс күшін заңсыз тарту») бойынша іс қозғалып, тергеу жүргізіліп жатыр.
Тергеу барысында заңсыз құжат рәсімдегендер де анықталды. Астана қаласындағы университеттің бірінде жатақхана коменданты 56 еңбек мигрантына студент ретінде уақытша тұруға рұқсат берген. Ал Алматы облысында нотариустың көмекшісі шетелдіктерді ойдан шығарылған мекенжайларға тіркеу үшін жалған сенімхаттар рәсімдеген.
«Шетелдіктердің келуі туралы хабарлама беру, жеке сәйкестендіру нөмірін алу, дакторегистрацияны өту және уақытша тұруға рұқсат рәсімдеу үшін мемлекет төлем алмайды», – деп мәлімдеген ІІМ Көші-қон қызметі комитетінің төрағасы Аслан Аталықов тұрғындарды заң мен тәртіпті сақтауға шақырды.
Cурет: Polisia.kz
