Қазақстанның мұнай өндіру көлемі ақпан айында ОПЕК+ келісімі бойынша белгіленген міндеттемелерден асып түсті.
Энергетика министрлігінің мәліметінше, бұл өсім Теңіз кен орнындағы Болашақ кеңейту жобасы аясындағы технологиялық процестерге байланысты болған.
Министрлік уақытша өндіріс көлемінің артуын өтеу үшін қажетті шараларды қабылдағанын және жақын арада өндіріс көлемі белгіленген лимиттерге толық сәйкес келетіндей реттелетінін айтты.
«Қазақстанның жаһандық мұнай өндірісіндегі үлесі небәрі 1,5%, ал ОПЕК+ шеңберінде шамамен 3% екенін ескеру қажет. Бұл көрсеткіштер Қазақстанның әлемдік сұраныс пен ұсыныс балансына айтарлықтай әсер етпейтінін көрсетеді», — деп хабарлады министрлік.
Бұл туралы Reuters басылымы да жазды.
«Орталық Азия мемлекеті ақпан айында тәулігіне 1,767 миллион баррель мұнай өндірген, бұл қаңтардағы 1,570 миллион баррельден жоғары. Қазақстанның ОПЕК+ келісімі бойынша квотасы – тәулігіне 1,468 миллион баррель», — делінген басылым ақпаратында.
Бұған дейін де 2024 жылдың мамыр айында, Қазақстан ОПЕК+ квотасынан асып, тәулігіне 1,49 миллион баррель мұнай өндірген. Бұл квотадан тәулігіне 22 мың баррельге артық.
Сонымен қатар 2024 жылдың қараша айында Қазақстанның ОПЕК+ квотасын жүйелі түрде бұзып жатқаны және келесі жылы Теңіздегі өндірістің артуы жағдайды ушықтыруы мүмкін екені туралы болжамдар болды.
Cурет: Depositphotos
