БҚО дене шынықтыру және спорт басқармасы грэпплинг спортымен шұғылданатын Ерлан Алмазұлына бірнеше жылдан берілмеген қаражатын төлейді. Бұл жөнінде Zaki Consulting компаниясының заңгері Бауыржан Зәки хабарлады.
Заңгерге 2024 жылдың қазан айында 20 жастағы спортшы жүгінген. Ерлан 2022 жылы Испанияда 25 елдің спортшылары қатысқан жастар арасындағы әлем чемпионатында (Grappling World Championships) 92 келі салмақ дәрежесінде 2-орын алған. 2023 жылы Польшаның Варшава қаласында 30 мемлекеттен келген жастар арасында (Senior, U20 & U17 World Grappling Championships) ұйымдастырылған сайыста 100 келі салмақ бойынша әлем чемпионы атанды.
БҚО әкімдігінің 2017 жылдың 7 тамызында шыққан № 211 қаулысы бойынша оған ай сайын ақшалай жабдықталым төлемі берілуі тиіс болған. Қаулы аясында «Спорт түрлері бойынша республика құрама командаларының спортшыларына, сондай-ақ спорттың ойналатын түрлері бойынша республика құрама командаларының құрамындағы спортшыларға ай сайынғы ақшалай жабдықталым төлемдерінің мөлшері» бекітілген.
Соған сәйкес заңгер бас-аяғы екі жүлде үшін спортшыға жалпы 1 940 000 теңге берілуі керек деп есептейді. Өйткені қаулы бойынша жазғы спорт түрінен өткен халықаралық жарыстарда жүлделі орын алса, әкімдік спортшыларға ай сайынға төлем тағайындауы тиіс.
Спорт басқармасының бұрынғы басшысы Жеңіс Нығметуллин қаражатты төлеуден бас тартқан. Экс-басшы «спортшы өз салмағында 10 елдің атынан спортшы қатысқан жарыста нәтижеге жеткенде ғана ақшалай жабдықталым төленеді» деген қағиданы алға тартқан. Одан кейін басқарма басшысының міндетін атқарушы Мирболат Нұржанов осы сыңайда жауап берген.
Заңгер хат жолдағаннан кейін Орал қаласының прокуроры Мейірхан Ізімов басқарманың «әр салмақ бойынша 10 спортшы қатысу қажет» деген 31.12.2020 жылғы №474 бұйрығын заңсыз деп таныды.
Туризм және спорт министрлігі де ақшалай көмек беру керек деп қолдады. Заңгерге спорт басқармасының жаңа басшысы Бақдаулет Сәбитов комиссияның кезекті отырысында осы мәселе қарастырылатынын, спортшы талабы заңға сәйкес деп танылса, қаражатты төлейтіндерін хабарлаған.
