Қарағанды облысының Қарқаралы ауданында қой-ешкі арасында жұқпалы ауру тарады. Бұл туралы Kaztag хабарлады.
Редакция мәліметінше, Мартбек Мамраев атындағы ауылдық округте орналасқан «Айса» шаруа қожалығында ұсақ малда инфекциялық энтеротоксемия анықталған. Осыған байланысты мал айдауға шектеу қойылды.
Инфекциялық энтеротоксемия — ауыл шаруашылығы жануарларында кездесетін жедел және аса қауіпті токсикоинфекциялық ауру. Бұл дерт өте жоғары өлім-жітім көрсеткішімен сипатталады. Аурудың өткір және өте ауыр түрде өтуіне байланысты оны емдеу қиын.
Өткен жылдың қыркүйегінде осы ауылдық округте мал қырылып, эмфизематозды карбункул ауруына байланысты карантин жарияланған болатын.
Биыл жыл басынан бері еліміздің бірнеше өңірінде мал ауруы тіркеліп жатыр. Атап айтқанда, Атырау қаласы маңындағы «Қайыршақты» ауылдық округіндегі «Абдулла» шаруа қожалығындағы 15 ірі қарадан қотыр ауруы анықталған.
Қостанай облысы Әулекөл ауданының Новоселов ауылында «ИНСПЭК» ЖШС-на қарасты шаруашылық өсіріп отырған ірі қара мал сарып ауруына шалдыққан.
Қостанай облысы Әулекөл ауданының Новоселов ауылында «ИНСПЭК» ЖШС-на қарасты ірі қара мал өсірумен айналысатын шаруашылықта бруцеллез анықталды.
Ақпан айында Қостанай облысының Қарабалық ауданында бруцеллез таралып, бірнеше ондаған мал ауру жұқтырды. Сол себепті 20 күндік карантин енгізілді.
Наурыз айының басында Ақтөбе облысында эмфизематозды карбункул ауруы анықталып, аймақта карантин енгізілді.
Сурет: Pixabay
