279 миллион теңгеден астам қаржыны ұрлаған «Қызылорда» магистральды газ құбырлары басқармасы басшысының бұрынғы орынбасары сотталды
Қызылорда облыстық соты «Қызылорда» Магистральдық газ құбырлары басқармасының бұрынғы басшысының орынбасарына қатысты сот үкімін шықты. Оған қызметтік өкілеттігін пайдаланып, алдау арқылы 279 миллион теңгеден астам қаржыны ұрлады деген айып тағылды. Бұл туралы бас көлік прокуратурасының баспасөз қызметі хабарлады.
Қызылорда облыстық сотының үкімі бойынша, сотталған азамат екі жыл бойы «OrdaGlass LTD» және «HH&B Holding» мердігер ұйымдарымен келісімшарттарды қымбат бағамен жасаған.
«Ол мердігерлерді жаңылыстырып, қаржының көп бөлігі құрылыс- монтаж жұмыстарына жұмсалғанын, сондай-ақ құрылыс материалдарының бағасы айтарлықтай өскенін мәлімдеген. Басты көлік прокуратурасының мемлекеттік айыптаушысы оның кінәсін сотта дәлелдеп шықты», – делінген хабарламада.
Сотталушы алты жылға бас бостандығынан айырылып, мемлекеттік қызмет пен квазимемлекеттік секторда лауазымдық қызмет атқару құқығынан өмір бойына айырылды.
Сот үкімі заңды күшіне енді.
