Қарағанды облысының Шет ауданында электр қуатын жеткізу мәселесіне байланысты төтенше жағдай режимі жарияланды. Бұл жөнінде аудан әкімдігі хабарлады.
Ауданда электр желілері апатты жағдайда деп танылған.
Кейінгі жылдары аудан орталығында және ауылдарда тоқ жиі сөніп қалады. Тұрғындар бірнеше рет мәселе көтеріп, облыс және аудан әкімдіктері мен тиісті мекемелер кеңселерінің табалдырығын тоздырған.
-Жел күшейген кезде тоқ сөніп қалады. Былтыр Жаңа жыл мерекесі кезінде боран соғып, бес күн бойы тоқ болмады. 2021 жылы Шет ауданындағы Шопа ауылына көшіп келгенмін. Сол кезде ауылда 100 киловаттық трансформатор тұрды. Соның кесірінен кейде тоқ кернеуі күшейіп, қаншама үйдің тұрмыстық техникалары пайдалануға жарамсыз болып қалып жататын. Содан «Шет-Энерго» ЖШС-мен соттасып жүріп, 160 киловаттық трансформаторды қойғызғанбыз. Электр желілері әбден тозған, оны жөндеуге компания инвестиция салмайды. Әбден ескірген сым бойында электр қуатының біраз бөлігі жоғалып жатыр. Жоғалған тоқ шығынын кім өтейді деген заңды сауал туындайды. Тоқты таратушы мекеме оны жеткізуші компаниямен келісімшарт жасасуы керек. Бұлай істеуге «Шет-Энерго» мүлдем құлықсыз. Екі ортада халық зардап шегіп отыр. Мұндай жағдай – Қазақстан бойынша ортақ мәселе, — дейді қоғам белсендісі, Шопа ауылының тұрғыны Жексен Абдрахманов.
Шет ауданының әкімдігі электр энергиясын беруді қалпына келтіру үшін жергілікті ауқымда төтенше жағдай режимін жариялады. Шенеуніктердің бұдан басқа амалы қалмаған. «Шет-Энерго» ЖШС «Жезқазған электр тарату желісі компаниясы» АҚ-ның электр энергиясын беру жөніндегі талаптарын орындамайды. «Шет-Энерго» ұзақ жылдар бойы электр желілерін жаңғыртуға қаражат бөлмеген. Соның салдарынан электр қуаты жиі сөнеді. Аудан тұрғындары тоқсыз, тіпті кейбірі жылусыз да қалып қояды.
-Тоқ өткізуші компания мен тоқ беруші «Шет-Энерго» ЖШС арасында келісімшарттың болмауы және ұзақ жылдан бері ескірген желілердің жөнделмеуі жағдайды ушықтырып отыр. Бұл кәсіпорын алдағы уақытта тұрғындарға сапалы қызмет көрсете алмайтындықтан, заң шеңберінде реквизиция жасау мәселесі қарастырылады. Осы орайда аудандағы электр желілері мен подстанцияларды дереу қалпына келтіруге аудан аумағындағы кәсіпорындарды тарту мәселесі қарастырылып отыр, — деп мәлімдеді Шет ауданының әкімі Мұхит Мұхтаров.
Аудан аумағында 3000-ға жуық үй мен 43 әлеуметтік нысан бар. Жалпы 15 мыңнан астам адам тұрады.
Үкімет бұл мәселе жөнінде хабардар. Облыс әкімдігіне түйткілді шешу жөнінде тапсырма берген. Әкімдік осыдан үш ай бұрын «Шет-Энерго» компаниясының мүлкін мемлекетке қайтарғысы келетінін хабарлаған.
«Шет-Энерго» ЖШС 27 елді мекенді электр қуатымен қамтамасыз етіп келеді.
фото: pexels
