Қазақстандағы миллиардердің бірі Тимур Құлыбаев елдің алғашқы президенті тұсында жинаған байлығына қатысты үкіметтік тергеу аясында мемлекетке шамамен 1 миллиард доллар төлеу туралы келіссөз жүргізіп жатыр. Бұл туралы Bloomberg агенттігі жазды.
Агенттіктің хабарлауынша, егер келісім сәтті аяқталса, бұрынғы президент Нұрсұлтан Назарбаевтың күйеу баласы Тимур Құлыбаев төлемдер мен инвестициялар комбинациясын жасайды. Яғни төлемнің бір бөлігін ақшалай, бір бөлігін инвестиция түрінде жасайды.
Сондай-ақ «бұл төлем оның кінәсін мойындау дегенді білдірмейді»,- деді дереккөз.
Bloomberg агенттігінің жазуынша, Тимур Құлыбаевтың өкілі бұл мәселенің мемлекеттік істерге қатысты екенін айтып, тікелей пікір білдіруден бас тартқан. Дегенмен, ол «кез келген төлемді активтерді қайтару деп атау дұрыс емес» екенін атап өтті.
Сондай-ақ, миллиардердің өкілі Құлыбаевтың жылдар бойы елдің экономикалық және әлеуметтік дамуына айтарлықтай үлес қосқанын және осы бағытта үкіметпен ынтымақтастықты жалғастырып отырғанын жеткізді.
Былтыр қарашада Тимур Құлыбаев Бас прокуратураның активтерді қайтару комитетін сотқа берді деген ақпарат тараған еді.
Бас прокуратура 2024 жылдың маусым айында Тимур Құлыбаевтың әкесі Асқар Құлыбаев құны 66 млн доллар құрайтын мұнай терминалын мемлекет меншігіне қайтарғанын хабарлады.
Құлыбаевтар отбасы – ең бай әулет. Ол Орта Азиядағы ең бай адамдардың бірі. Тимур Құлыбаевтың әйелі – Нұрсұлтан Назарбаевтың қызы Динара Құлыбаева. Forbes басылымының жазуынша, оллардың байлығы 5 млрд долларға бағаланып отыр.
Cурет: Ашық дереккөздерден
