Шахтинск қаласына қарасты Шахан кентінің тұрғындары үйлеріне жеткілікті деңгейде жылу жетпей жатқанына наразы. Sarapshy.info порталының Қарағанды облысындағы тілшісі түйткілді тарқатады.
Шахан елді мекенінің тұрғындары қақаған қыс кезінде баспаналарында тоңып отыр. Үш жыл бұрын Шаханда жаңадан жылу қазандығы салынған. Сол кезде тұрғындардың қуанышында шек болмаған. Алайда бүгінгі таңда олардың биліктен көңілі қалып, қынжылып отыр.
Шахандықтар әуел баста жылу қазандығын салған кезде мамандар қателікке жол берген дейді. Жылу қазандығы салынған кезде жобадан орталық жылу нысанын алып тастаған. Осының кесірінен жылу Шахандағы үйлердің барлығына бірдей қалыпты деңгейде жетпейді. Суықтан қажыған тұрғындарға билік қосымша насос орнатып алуға кеңес берген. Амалы таусылған жұрт өз қаражаттарына насос қондырған. Алайда оған электр қуаты көп жұмсалады. Бұл жайт халықтың қалтасын қағып отыр. Жергілікті жұрт жылу ақысын толық төлейді, бұған қоса электр энергиясына тағы қаражат шығындайды.
«Жылу желісінде қысым жетіспейді, сондықтан үйлер салқын болып тұр. Қысымды көбейту үшін тұрғындар өз қаражаттарына насостар орнатқан, бірақ бұдан мәселе шешілген жоқ. Халық электр қуатына да көп ақша жұмсап отыр. Қазандықты салған кезде орталық жылу пунктісін алып тастаған, сол себепті жылу толық жетпейді. Бүгінде бұл жоба дайын, бірақ оған қаражат бөлінбеген. Біз арыз-шағымымызды Премьер-министрге жолдадық. Бірақ бұл әрекетімізден пайда болған жоқ, олар біздің арызды облыс әкімдігіне жіберген. Біздің биліктің жұмыс тәсілі осы ғой, құзырлы органға көмек сұрап, хат жазасаң, олар өңірге кері жолдай салады. Не үшін олай істейді, түсінбеймін, бәрібір қаражатты бөлетін республикалық деңгейдегі ведмстволар ғой», — деп қынжылады Шахан қаласының тұрғыны Светлана Ержұманова.
Осылайша кент тұрғындарының жартысынан көбі жылуға жарымай отыр. Ал Шахтинск қаласының әкімдігі елді мекенді жылытатын қазандықтың температуралық кестені сақтай отырып, штаттық режимде жұмыс істеп тұрғанын әрі көмір қорының жеткілікті деңгейде екенін мәлімдеді. Ал жылу деңгейін көтеруге қажетті орталық жылу нысанын жобаға енгізу үшін шенеуніктер әрекет етудеміз дейді.
«Шахтинск қаласының құрылыс бөлімінде «Шахан кентінде жылу желілерін салу» жобасы бар. Жоба бойынша сараптаманың оң қорытындысы берілген. Жобаны іске асыру мақсатында бюджеттен қаржы бөлуге өтінім жіберілді. Бюджеттік өтінім бүгінде қаралуда. Мемлекеттік сараптама қорытындысына сәйкес жобаның құны 1 021 829 000 теңгені құрайды», — деп хабарлады Шахтинск қаласының әкімдігі.
Шахан елді мекенінде 2 500-ге жуық абонент жылу желілеріне қосылған. Әкімдік мамандары былтыр жылыту маусымына дайындық жеткілікті деңгейде орындалған деп отыр. Дегенмен Шахан тұрғындары кентте орталық жылу желісіне қосылмай қалған жер үйлердің бар екенін, олардан таралған түтін қала экологиясын нашарлатып тұрғанын да айтады.
Айта кетейік, 2017 жылдың 1 қаңтарында Шахандағы бес қабатты үйде жылу қазандығы жарылды. Соның салдарынан тоғыз адам мерт болды. Оның үшеуі – балалар. Сол жылы жылу жүйесіне жауапты шенеуніктер сотталды.
Сурет: gov.kz
