Халықаралық валюта қоры (ХВҚ) Қазақстанға Ұлттық қорға тәуелдікті азайту керек екенін мәлімдеді. Бұл туралы 2025 жылғы 31 қаңтарында Халықаралық валюта қорының (ХВҚ) Қазақстанға жасалған миссияның қорытындысы бойынша Персонал есебінде (Staff Report) жариялады.
Зерттеу нәтижесінде Қазақстандағы инфляция тұрақты деңгейге жеткенше қатаң ақша-кредит саясатын сақтауды ұсынды. Сонымен қатар экономиканың тұрақтылығын арттыру үшін құрылымдық реформаларды жеделдету қажет екені жазылған.
Оның бірі экономиканы әртараптандыру – мұнайға тәуелдікті азайтып, басқа секторларды дамыту. Келесі ұсыныс мемлекеттің экономикадағы үлесін азайту – жеке секторды дамытуға жағдай жасау. «Жасыл экономика» бастамаларын іске асыру – экологиялық тұрақтылықты қамтамасыз ету. Ұлттық қорға тәуелділікті азайту – мемлекеттік қаржы жүйесін реформалау. Фискалдық шоғырландыру мен ашықтықты күшейту – бюджеттік саясаттың ашықтығын арттыру.
ХВҚ болжамы бойынша 2025 жылы Қазақстан экономикасы 5%-ға дейін өседі. Оған Теңіз мұнай кен орнын кеңейту және экономиканы қолдауға бағытталған бюджеттік шығыстар ықпал етеді дейді. Оған қоса кейбір тәуекел факторларын да атап өтті.
Бірінші, серіктес елдер экономикасының баяулауы. Екінші, аймақтағы геосаяси шиеленістер. Үшінші, қайталама санкциялар қаупі. Төртінші, шикізат бағасының құбылмалылығы және экспорттық құбырлардың тұрақсыз жұмысы.
ХВҚ Қазақстан экономикасының тұрақтылығын, инфляция деңгейінің төмендегенін және қолайлы макроэкономикалық жағдай қалыптасқан дейді.
«ХВҚ Қазақстан экономикасының тұрақтылығын, инфляция деңгейінің төмендегенін, қолайлы макроэкономикалық жағдай қалыптасқанын және саяси тұрақтылық барын атап өтті. Есепте мемлекеттің ауқымды ішкі және сыртқы резервтері, ақша-кредит саясаты трансмиссиясының (әсері) соңғы жылдарда жақсарғаны және тұтынушылық кредиттеу өскеніне қарамастан банк жүйесінің тұрақты екені айтылады. Яғни, реттеушілік талаптарды сақтау және қайталама санкциялардың алдын алу аймақтық шиеленістердің экономикалық әсерін азайтуға ықпал етті», — делінген хабарламада.
ХВҚ Қазақстанның сыртқы сын-қатерлерге қарсы тұруы үшін реформаларды жалғастыру маңызды екенін айтады. Экономиканы әртараптандыру, қаржылық тұрақтылықты нығайту және мемлекеттік басқаруды жетілдіру – негізгі басымдықтар ретінде көрсетіледі.
Сурет: Ашық дереккөзден
