20 қаңтарда Дональд Трамп ант қабылдап, ресми түрде АҚШ-тың 47-президенті лауазымына сайланды. Жаңа президент өзі жеңіске жеткен сайлау нәтижесі жарияланған күнді «Ел тарихындағы ұлы күн» деп мәлімдеді.
Бұқаралық ақпарат құралдары Трамп алғашқы өзгерісті Ақ үйдің ресми веб-сайтын өзгертуден бастады деп жазуда. Сайтта президенттің жаңа суреттері мен «Америка қайта оралды!» ұраны пайда болған.
«Мен күн сайын әр тынысыммен сіздер үшін күресемін. Мен балаларымыз бен сіздер лайықты, мықты, қауіпсіз және гүлденген Американы құрмайынша, тынышталмаймын. Бұл, шынымен де, Американың алтын ғасыры болады», — деген жазу бірден көзге түседі.
78 жастағы Трамп 2017-2021 жылдар аралығында АҚШ-тың 45-президенті болған еді.
Трамптың инаугурациядан кейінгі алғаш қолға алған шараларының бірі АҚШ пен Мексика шекарасында төтенше жағдай жариялау болды. Ол ауқымды иммиграциялық науқанды бастады. АҚШ әскери күштеріне шекара қауіпсіздігін қамтамасыз етуді тапсырды, баспана беру мүмкіндігін кең көлемде шектеп, АҚШ аумағында туған балаларға азаматтық беруді шектеу шараларын қабылдады.
«Республикашыл Дональд Трамп Ақ үйге қайта оралып, шекара қауіпсіздігін күшейтіп, рекордтық деңгейде мигранттарды депортациялауға уәде берді. Трамп демократ Байденді президенттік кезінде заңсыз иммиграция деңгейінің жоғары болғаны үшін сынға алды. Алайда, өткен жылы Байден өз саясатын қатайтқан соң және Мексика шекараны бақылауды күшейткеннен кейін, шекараны заңсыз кесіп өткен мигранттардың саны күрт азайды», — деп жазды Reuters басылымы.
Reuters басылымының жазуынша, 78 жастағы президент дүйсенбі күні бұрынғы демократ-президент Джо Байден әкімшілігінің шамамен 80 атқарушылық жарлығын жоятынын мәлімдеді.
Трамп Мексика бұғазының атауын «Америка бұғазы» деп өзгертуге ниетті екенін айтты және Панама каналын бақылауға алуға уәде берді.
Ол сондай-ақ Құрама Штаттар 2029 жылдың қаңтарында, лауазымдық міндеті аяқталатын мерзімінде Марсқа адам жіберетініне уәде берді.
Сондай-ақ ол өзіне осыған дейін жасалған қастандықты айтып, «Мені Құдай сақтады» деді. Сонымен қатар «Мен – бітімгермін, соғыстарды, басталмаған соғыстарды да аяқтаймын», — деп те мәлімдеме жасады.
Одан бөлек ол өзінің экономика саласындағы жоспарларын жариялап, инфляцияны азайту, бағаның өсуін тоқтату және АҚШ-тың мұнай өндірісін арттыруға уәде берген. Ол сондай-ақ автокөлік өндірісін дамыту, газ өндіруді күшейту, АҚШ өнеркәсібін дамыту үшін салықтарды азайтып, шетелдік тауарларға тарифтерді көтеруді ұсынды. Сонымен қатар, ол сырттан түсетін табысты басқаратын мекеме құрып, оның «сыртқы көздерден қыруар қаражат жинайтынын» айтты. Үкімет жұмысын тиімді ету үшін жаңа министрлік құру туралы да мәлімдеді.
Трамптың ант қабылдау рәсіміне куә болуға келген халықтың пікірі сан алуан. Бұл туралы Reuters басылымы былай жазды:
«Олардың көпшілігі АҚШ-тың жаңа президенті Дональд Трамптың ұзақ жылдар бойы қолдаушылары болды, оның «Американы қайтадан ұлы етеді» дегеніне шын жүректен сенетін MAGA қалпақ киген митинг ардагерлері. Кейбіреулер Трамптың сөзін бұрын ешқашан естімеген және қызығушылық танытқан. Кейбіреулер тарихты іс жүзінде көргісі келді. Кейбіреулер оған қарсылық білдірді», — деді.
Қазақстан Президенті Қасым-Жомарт Тоқаев Дональд Трампқа жеделхат жолдап, Вашингтонда өткен ұлықтау рәсімінде АҚШ Президенті қызметіне ресми түрде кірісуімен құттықтады.
Сурет: Forbes.kz
