Экс-Президент Нұрсұлтан Назарбаевтың інісі Болат Назарбаевтың ұлы Ханболат Назарбаев Астана қаласындағы заңсыз салынған ғимаратты бауыры Данияр Кесікбаевқа сыйға тартты.
Бұл туралы Сыбайлас жемқорлықты тергеу қоры-бюросы Nege.Aqsha Telegram-арнасына сілтеме жасап хабарлады.
Данияр Кесікбаев пен Ханболат Назарбаевтың аналары бір, әкелері бөлек.
Оқиға қалай басталды?
2024 жылдың наурыз айында Ханболат Назарбаевқа Тәуелсіздік даңғылындағы заңсыз салынған сауда-ойын-сауық орталығы үшін айыппұл салынды. Бұрын бұл жерде қонақүй мен мейрамхана орналасқан. Аталған жер телімі 2020 жылдың ақпан айында Ханболаттың туған күніне сыйлыққа берілген. Ол сол жердегі қонақ үй мен мейрамхананы бұзып, оның орнына рұқсатсыз және алдын ала ескертусіз сауда орталығын сала бастаған.
Нәтижесінде жер туралы заңнаманы және сәулет, қала құрылысы және құрылыс қызметі жөніндегі қағиданы бұзғаны үшін Ханболат Назарбаевқа 103 500 теңге көлемінде айыппұл салынып, заңсыз салынған құрылысты жою міндеттелген еді. Алайда ол бұл міндетті орындаудың орнына ғимаратты бауырына сыйға тартуды шешкен.
Сот шешімі әлі орындалған жоқ
«Астана қаласының қалалық орта сапасы және бақылау басқармасы» ММ сыйға тарту келісімін жарамсыз деп тану үшін сотқа шағым түсірген.
«Сүру туралы қаулы Астана қаласының әділет департаментіне орындалуға жіберілді. Департаменттің мәліметі бойынша Х. Болатұлы аталған объектіні сыйға тарту келісімімен Д. Кесікбаевқа өткізгені анықталды», – деп хабарлады ведомство басшысы Ғани Тәжиев.
Сурет: Akorda.kz
