Солтүстік Қазақстан облысында криптовалютадан заңсыз жолмен табыс тапқан күдіктілерге қатысты іс қозғалды.
Олар Қазақстанда тыйым салынған криптобиржа арқылы операция жүргізген. 380 адам заңсыз активтер есебінен транзакция жасап үлгерген.
«Үш азамат тиісті лицензиясыз криптовалюта қабылдау және айырбастау операцияларын жүргізген. Олар криптовалюта биржаларынан алынған қаражатты пайдаланып, криптоәмиян арқылы қамтамасыз етілмеген цифрлық активтермен айырбас операцияларын жүзеге асырған», – деп хабарлады Қаржы мониторингі агенттігі.
Өздері ұйымдастырған схема нәтижесінде цифрлық активтерді төл валютамен сатқан. Осының салдарынан 681 млн теңге заңсыз айналымға қосылған. Сот үш адамға 2,5 жылдан 3,5 жылға дейін түрме жазасын кесті.
Заңсыз криптовалюта тартқандар үшеуінің құны 400 млн теңге болатын мүлкі тәркіленді:
- 10 млн теңге көлемінде активтер,
- 150 млн теңге бағасындағы жылжымайтын мүлік,
- жалпы құны 213 млн теңге болатын бес көлік,
- 12 млн теңге тұратын квадроцикл және қымбат компьютерлік жабдықтар.
ҚМА заңсыз операцияны кибералаяқтар жүргізетінін ескертті. 2024 жылы осы нарықта есірткі саудаланып, оның құны 10 млрд теңгеге жуықтаған.
фото: Р. Пименов/ТАСС
