Ресей Федерациясының президенті Владимир Путин запасындағы әскери міндеттілерін әскери жиындарға шақыру туралы жарлыққа қол қойды. Құжат ресейлік құқықтық ақпарат порталында жарияланды.
«2025 жылы Ресей Федерациясының қордағы азаматтарын РФ қарулы күштерінде, РФ ұлттық гвардия әскерлерінде, РФ азаматтық қорғаныс, төтенше жағдайлар және табиғи апаттардың салдарын жою істері министрлігінің құтқарушы әскери құрылымдарында, мемлекеттік күзет органдарында және федералдық қауіпсіздік қызметі органдарында әскери жиындардан өту үшін шақыру», — делінген құжатта.
Жарлыққа сәйкес, үкімет пен аймақтық билік органдарына азаматтарды әскери жиындарға шақыру және оларды өткізу бойынша іс-шараларды қамтамасыз ету тапсырылды.
Запастағыларды әскери жиындарға шақыру жыл сайын өткізіледі. Путиннің жарлығы негізінде қорғаныс министрлігінің мобилизациялық басқармасы тиісті директива дайындайды, ол аймақтық әскери комиссариаттарға жіберіледі, содан кейін қордағы азаматтарға шақыру қағаздары жіберіле бастайды.
Мысалы, 2024 жылы осындай жарлық наурыз айында, ал 2023 жылы мамыр айында жарияланған болатын.
РФ Мемлекеттік Думасының қорғаныс комитетінің мүшесі Евгений Лебедевтің айтуынша, жиындарды армияға шақырумен шатастырмау керек. «Бұл сөздің толық мағынасында армияға шақыру емес — бұл армияға жиындарға шақыру, онда қатысушылар қысқа мерзімді курс, маневрлік оқыту өтіп, өздерінің әскери мамандықтары бойынша дағдыларын қалпына келтіреді. Осыдан кейін оларды үйлеріне, жұмыстарына жібереді. Олар мемлекет тарапынан шақырылады, жиындар кезінде олардың жалақысы сақталады», — деп түсіндірді Лебедев.
Еске сала кетсек, Украина әскеріне тұтқынға түскен солтүстіккорейліктер Ресейге оқу-жаттығуға бара жатырмыз деп ойлағанын айтқан. Бірнеше күн бұрын Украина президенті Володимир Зеленський Пхеньян тарабына бұл тұтқындарға Ресей қолындағы украин тұтқындарын ауыстыратынын мәлімдеді. Кремль әлі пікір білдірген жоқ. Әлемдік БАҚ солтүстіккорейлік әскерилер қалайда тұтқынға түспеуге тырысып жатқанын, ондай жағдайда өз-өздерін гранатамен жарып жіберіп жатқанын жазуда. Мұны олар Солтүстік Кореядағы отбасы мүшелеріне қауіп төндірмеу үшін жасауға мәжбүр деп түсіндіруде.
