2025 жылғы 15 қаңтар күні сағат 07:30 шамасында «Алматы-Өскемен» автожолының 28-шақырым учаскесінде («Алматы-Қонаев» бағытында) 18 автокөлік соғылды.
Алдын ала мәліметтер бойынша, жүргізушілер қалың тұманнан жолды анық көре алмаған. Салдарынан жылдамдық пен қауіпсіз арақашықты сақтамаған.
Оқиға болған жол учаскесі ІА техникалық санатқа жатады, 6 жолақты.
Жол-көлік оқиғасы нәтижесінде зардап шеккендер мен қаза тапқандар жоқ. Соңғы мәліметтер бойынша жол бойынан 18 көліктің 16-сы шығарылған. Екі көлік эвакуатор күтіп тұр.
Естеріңізге сала кетейік, жыл басында, 3 қаңтарда «Астана – Щучинск» тас жолында ауа райының қолайсыздығынан 100-ге жуық көлік соқтығысқан еді. Боран мен жолдың нашар көрінуі салдарынан жаппай жол апаты болды.
Бас прокуратураның Құқықтық статистика және есепке алу комитетінің мәліметі бойынша жыл басынан бері 673 жол-көлік оқиғасы тіркелген. Оның ең көбі Алматы қаласы мен облысында болған. Үшінші орында Атырау облысы тұр.
Құқықтық статистика комитетінің ресми мәліметі бойынша, 2024 жылдың 12 айында Қазақстан бойынша 31597 жол-көлік оқиғасы (ЖКО) тіркелген. Бұл көрсеткіш 2023 жылмен (15886 жол-көлік оқиғасы) салыстырғанда екі есе көп.
Сәйкесінше, жол апатынан жараланғандар саны да екі есе артқан. 2024 жылы жараланғандар саны — 40873 болса, 2023 жылы 19554 болған. Ал қаза болғандар саны былтыр — 2579 адам, 2023 жылы 2543 болған.
Сурет: коллаж Ulysmedia.kz (видео скриндері)
