Қостанай облысы Әулекөл ауданының Новоселов ауылында «ИНСПЭК» ЖШС-на қарасты ірі қара мал өсірумен айналысатын шаруашылықта бруцеллез анықталды. Осыған байланысты Әулиекөл аудандық әкімдігі ауылдық округте шектеулер енгізетіні туралы құжатты «Ашық НҚА» сайтына жариялаған.
Құжатта бруцеллез ауруының пайда болуына байланысты шектеу іс-шаралары егжей-тегжейлі жазылған.
«Шектеу қойылған аумақ арқылы жануарларды алып өтуге (айдап өтуге), бұл аумаққа сау жануарларды тасып әкелуге (кіргізуге), союға жөнелту жағдайларын қоспағанда, осы аумақтан жануарларды тасып әкетуге (шығаруға), эпизоотиялық ошақтар белгіленген саламатсыз аумақта пішен, сабан және басқа да ірі азықтарды басқа аумаққа әкету үшін дайындауға, сондай-ақ жануарларды немесе адамдарды жинаумен байланысты іс-шараларды жүргізуге жол берілмейді», — деп көрсетілген құжатта.
Бруцеллез – жануардан адамға жұғатын ауру. Адам мал шаруашылығы өнімін (ірімшік, қаймақ, ет) тұтыну арқылы жұқтырады.
БҚО-да 2024 жылдың 9 айында бруцеллез ауруына 620,6 мың ірі қара зерттеліп (96%), 4 836 малдан бруцеллез анықталған. Ал ұсақ мал арасында күні бүгінге 1019,4 мың бас зерттеліп (92%), 1115 қой-ешкіден инфекция табылған. 863 түйе зерттеліп (82%), 8 бастан ауру шыққан.
Ал Батыс Қазақстан облысы санитариялық-эпидемиологиялық бақылау департаментінің sarapshy.info редакциясына берген мәліметі бойынша, 2024 жылдың 9 айы ішінде облыста 30 адам сарып індетін жұқтырған. Оның алтауы – балалар.
Сурет: Жасанды интеллект көмегімен жасалған
