2025 жылы Қатонқарағай, Зайсан және Кендірлі өңірлеріне жаңа әуежайлар салынады. Бұл туралы Үкімет отырысында Көлік министрлігі мәлімдеді.
Министрлік 2030 жылға дейін 4,7 мың шақырым жаңа автожол салуды, оның ішінде 3,7 мың шақырым І санаттағы жолдарды салуды жоспарлап отыр.
2025 жылы аяқталуы жоспарланған негізгі жобалар қатарында Қызылорда – Жезқазған (208 км), Ақтөбе – Ұлғайсын (234 км), Қарағанды – Жезқазған (572 км), Сарыағаш қаласы айналма жолы (102 км), Атырау – Орал (516 км, орташа жөндеу), Жайық өзені арқылы өтетін көпір (6,5 км) бар. Министрлік бұл жобаларға 9 трлн теңгеден астам инвестиция тартуды жоспарлаған.
«Темір жол саласы бойынша 2025 жылы 225 жаңа вагон сатып алынады. «Достық – Мойынты» темір жол жобасы аяқталып, өткізу қабілеті 5 есеге артады. «Достық – Бескөл» және «Мойынты – Балқаш» бағыттарында пойыз қозғалысы ашылады», — деп көрсетілген хабарламада.
Ақтау портында контейнерлік хаб салу арқылы порттың өткізу қабілеті жылына 240 мың ЖФЭ-ге дейін арттыру жоспарлануда.
«Бұл Қазақстанның халықаралық логистикадағы орнын нығайтып, Әзербайжан, Грузия және Түркия арқылы өтетін Транскаспий бағытындағы контейнерлер тасымалы көлемін ұлғайтуға, сондай-ақ Қытайдан Еуропаға жеткізілетін транзиттік жүктердің бір бөлігін қайта бағыттауға мүмкіндік береді», — деді Көлік министрлігі.
Сурет: Pixabay.com
