2025 жылы Ресей Қазақстанға 1,12 миллион тонна мотор отыны мен мазутты бажсыз жеткізу квотасын сақтап қалды. Сондай-ақ Батыс Қазақстан облысындағы «Конденсат» мұнай өңдеу зауытына (МӨЗ) 225 мың тонна бензинді Еуразиялық экономикалық одақтан (ЕАЭО) тыс жерлерге экспорттауға рұқсат берілді.
Reuters агенттігінің мәліметінше, 2024 жылғы 25 желтоқсанда Қазақстан мен Ресейдің энергетика министрлері 2025 жылғы мұнай өнімдерін жеткізу туралы жаңартылған үкіметаралық келісімге қол қойды. Келісімге сәйкес, Қазақстанға 285 мың тонна автобензинге квота бөлінді. Мәслелен, Аи-92 – 240 мың тонна, Аи-95 – 40 мың тонна, Аи-98 – 5 мың тонна.
Бажсыз дизель отынын Қазақстанға 450 мың тонна, авиациялық керосин – 300 мың тонна, «Байқоңырэнерго» қажеттіліктері үшін мазут – 85 мың тонна көлемінде әкелуге болады.
Батыс Қазақстан облысында орналасқан «Конденсат» мұнай өңдеу зауыты Ресейден импортталатын нафтаны (мұнай өнімі) өңдеумен айналысады. 2025 жылға арналған келісімде зауытқа 225 мың тонна Аи-92 және Аи-95 маркалы бензинді ЕАЭО-дан тыс жерлерге экспорттауға квота бөлінді. Бұл квота алғаш рет 2024 жылы бекітілген еді.
Қазақстанның басқа мұнай өңдеу зауыттары үшін ЕАЭО-дан тыс жерлерге мұнай өнімдерін экспорттауға белгілі бір шектеулер сақталды. Бұл шектеулер жеңіл дистилляттар, дизель отыны, авиациялық керосин, ароматикалық көмірсутектер, битум өнімдеріне жасалды.
Сурет: Pixabay.com
