Жетісу облысы Сарқан ауданында күйдіргі ауыруына ұшыраған мал қорымына аумаққа жақын орналасқан 14,6 гектар жер мемлекетке қайтарылды. Ауыл шаруашылығы министрлігінің Жер ресурстарын басқару комитеті мен Жетісу облысының экологиялық прокуратурасының ықпалымен шара қабылданды.
Сарқан ауданындағы пайдалы қазбаларды өндірумен айналысқан жер пайдаланушыға қатысты сотқа талап арыз берілген.
«Талап арызда жерді жалға алу шартын жарамсыз деп тану, бүлінген жерлерді қалпына келтіру және ұзақ мерзімді жалға алу құқығын тіркеуді жою талаптары қойылды», — делінген хабарламада.
Өз кезегінде Жетісу облысының мамандандырылған ауданаралық экономикалық соты бұл талаптарды толық қанағаттандырды.
Сот шешімімен аталған жерлер мемлекеттік жер қорына қайтарылды.
Естеріңізге сала кетейік, 2024 жылы көктемгі су тасқыны кезінде сібір жарасы көмілген жерлер су астында қалды. Мысалы, Ақтөбе облысында үш сібір жарасы қорымын су басты.
Батыс Қазақстан облысында да осындай жағдай тіркелді. Су тасқыны кезінде сегіз мал қорымы мен 14 сібір жарасы қорымы су астында қалған.
Күйдіргі (Сібір жарасы) — адам мен жануарларға ортақ, Bacillus anthracis бактериясынан туындайтын аса қауіпті жұқпалы ауру. Ол малдан (қой, сиыр, түйе, жылқы) адамға көбінесе жанасу арқылы жұғады. Сонымен қатар ет және мал өнімдерімен немесе топырақ арқылы таралады.
Сібір жарасы ауруының инкубациялық кезеңі бірнеше сағаттан 14 күнге дейін созылады, көбіне симптомдар 3-6 күнде пайда болады. Белгілері әлсіздік, дене қызуының көтерілуі, лимфа түйіндерінің ісінуі, жүрек соғуының жиілеуі. Терідегі микрожарақаттар арқылы түскен бактерия тері түріндегі сібір жарасын қоздырады. Бұл түрі аурудың ең жиі кездесетін формасы.
2024 жылы Қазақстанда сібір жарасы ауруының көрсеткіші өткен жылмен салыстырғанда екі есе төмендеді. Өткен жылы ел бойынша 17 жағдай тіркелген.
