«Оңтүстік шахта құрылыс» ЖШС-нің 156 жұмысшысына 165 миллион теңгеден астам жалақы төленбеген. Істің мән-жайын Ақтөбе облысы Хромтау аудандық прокуратурасы анықтады.
Мәселені шешу үшін прокуратураның үйлестіруімен құқық қорғау органдары, жергілікті атқарушы органдар және уәкілетті мекемелер басшыларының қатысуымен кеңес өткізілді. Кеңеске «ҚазХром» ТҰК» АҚ басшылығы мен ЖШС құрылтайшылары да қатысты. Нәтижесінде, жұмысшылардың жалақы қарызы толығымен өтелді.
Сонымен қатар, Шалқар аудандық прокуратурасы «Ұлы Борсық» коммуналдық мемлекеттік кәсіпорнының 519 қызметкерге 48 миллион теңгеден астам жалақы төлемегенін анықтады. Прокурордың ықпалымен бұл қарыз да өтелді.
«Аталған кәсіпорындардағы 213 млн теңге болатын жалақы қарыздары өтеліп, жұмысшылардың құқықтары қалпына келтірілді» — делінген хабарламада.
Сурет: Pexels.com
