Көктемгі су тасқыны кезінде Ақжайық ауданының тұрғыны 16 бас жылқысынан айырылған. Содан шаруа малдың құнын өтеуді сұрап, Ақжайық ауданының әкімдігіне және оған қарасты кәсіпкерлік және ауыл шаруашылығы бөліміне өтініш түсірді. Оған қоса облыс әкімдігіне де жүгінген.
Алайда азамат жергілікті атқарушы органдардан өтінішіне қанағаттанарлық жауап алмай, Батыс Қазақстан облысының мамандандырылған ауданаралық әкімшілік сотына жүгінеді. Сот әкімдік пен бөлім басшысына осы жағдай бойынша дәлелдер мен пікірлерді белгілі бір мерзімде ұсынуды тапсырды.
Бірақ шенеуніктер сотқа қажетті құжаттар мен дәлелдерді уақытында тапсырмады. Бұл жайт сот үдерісін кешіктірді.
«Соның салдарынан іс бойынша алдын ала тыңдау кейінге қалдырылды. Сот іс құжаттарын зерттеп қарап, жауапкерлердің келтірген уәждерін негізсіз және дәлелсіз деп, олардың іс-әрекеттерінде заңға және сотқа анық құрметтемеушілік көрсету оқиғасы орын алған деп таниды», – деп хабарлады БҚО сотының облыстық баспасөз қызметі.
Сот талаптарын орындамауына байланысты Ақжайық ауданының әкімі Мұрат Сердалиннің және аудандық кәсіпкерлік және ауыл шаруашылығы бөлімінің басшысы Әлібек Бәкіровтың әрқайсысынан 20 айлық есептік көрсеткіштен, яғни 73 840 теңгеден ақша өндіріп алынды.
БҚО баспасөз қызметі жылқы өтемақысын беруге қатысты әкімшілік істі қарау жалғастынын хабарлады.
Жергілікті ақпарат құралдарының мәліметінше, БҚО-да су тасқыны болған аудандардағы 1171 бас ауыл шаруашылығы жануарларының шығыны өтелген. Соның ішінде 219 бас ірі қара, 680 бас ұсақ мал, 63 бас жылқы, 71 бас шошқа және 138 бас құс үшін 151,6 млн теңге төленген.
Сурет: istockphoto.com
