Желтоқсанның 15-16-сы күндері еліміздің әртүрлі қаласында рейстер кешігіп жатыр. Атап айтқанда, қалың қар салдарынан Алматы әуежайына Қазақстанның басқа қалаларынан (Астана, Шымкент, Павлодар, т. б.) және басқа мемлекеттерден (Бангкок, Стамбул, Коломбо және басқалар) қатынайтын ұшақтар кідіруде.
Желтоқсанның 15-інде Алматыда қар молынан түскен. Өткен түнде қала әкімдігі барлық коммуналдық қызмет күшейтілген жұмыс режиміне ауыстырылғанын, ал көшелерге жүздеген қызметкер мен техника шығарылғанын хабарлады.
«Air Astana әуекомпаниясы Алматыдан ұшатын рейстердің қалың қар жаууына байланысты кешіктірілетінін хабарлайды. Қар ұшақтарды мұзға қарсы өңдеу жұмыстарына кедергі келтіреді. Әуежайға шықпас бұрын рейс статусын әуекомпания сайтынан тексеріп алуларыңызды сұраймыз», — деп ескертті компания.
Журналист Жадыра Аққайыр кеше түнде Астанадан Алматыға ұшуы керек болған. Алайда ұшуға 2 сағат қалғанда Flyarystan компаниясы пошта мен мессенджерге рейс кешігетінін хабарлайды.
«Жалпы алғанда әуежайда 6 сағатқа жуық күтіп отырдық. Мессенжердегі хатта кешіккен жағдайда компания қандай көмек беретіні жазылып тұрды. Яғни 2 сағат кешіксе — су, 4 сағаттан асса — ыстық тамақ, түнде 6 сағаттан астам күтсе — қонақ үй трансфермен дегендей. Бірақ шыны керек, судан басқа ештеңе ұсынбады. Күтіп отырғанымызға 5 сағаттан асқанда ыстық тамақ сұрадым. Сол кезде компания өкілі «сізді қазір ұшқалы тұрған рейске ауыстырайын» деп сол компанияның басқа ұшағына тіркеп берді. Тез арада ұшаққа отырып, таңғы беске таяу ұштық. Ұшаққа мінгенімізде әлгі өз рейсіміз 20:00-ге ауысты деген хат келді. Бірақ ол кезде біз басқа рейске мініп кеткен соң мән бермедік», — дейді ол.
Жолаушының айтуынша, ол компания өкілдеріне барып, мән-жайды сұрағанның арқасында орын тауып, басқа рейспен ұшқан. Ал өзге адамдар не істейді деп алаңдайды.
«Менің түсінбегенім — әуе рейсі ауа райына байланысты тоқтатылса, біз қалай ұштық? Бір әуекомпания, бірақ бір рейс кешіксе де ұшты. Екіншісі біржола тоқтатылды. Осы жері түсініксіз», — дейді Жадыра.
2024 жылдың қазанында Сенатор Андрей Лукин соңғы айлардағы рейстің кешігуі, компаниялардың жауапсыздығы мен халықтың наразылығына қатысты депутаттық сауал жолдаған.
Сауалда компаниялар тұтынушыларға тиісті деңгейде қызмет көрсетпейтіні айтылған. Авиакомпания жолаушыларға балама рейс немесе түнеп шығатын орын туралы ұсыныс жасамағанын, тіпті Air Astana әр жолаушыға өтемақы ретінде 2000 теңгелік ваучер беріп, наразылық туындатқанын да айтады.
Сурет: Tengrinews.kz
