«Астана-Бурабай курорты» бағыты бойынша жаңа туристік электр пойызы іске қосылды. Электр пойыз артықшылығы жолаушылар Астанадан Бурабайға аралық аялдамасыз 2 сағат 26 минутта жете алады. Ұлттық тасымалдаушының хабарлауынша, электр пойыз сейсенбі мен сәрсенбіден басқа күндері күн сайын қатынайды.
Пойыз отандық өндірісте жасалған 6 заманауи вагоннан тұрады. 574 жолаушыға арналған, орындықтар «Комфорт Плюс» еуропалық стандартына сай. Билет құны «Нұрлы Жол» станциясынан – 2770 теңге, «Астана» станциясынан – 2548 теңге деп көрсетілген.
«Жолаушылардың жайлылығы үшін пойызда микроклимат жүйесі, жылдам қуаттау үшін USB-розеткалар, ойын-сауық контентіне қолжетімді Wi-Fi желісі және велосипедтерге арналған бекіткіштер орнатылған. Мүмкіндігі шектеулі жолаушылар үшін арнайы көтергіштер мен арбаға арналған орындар қарастырылған. Туристік пойыздың дизайны Астананың көрікті жерлері мен Бурабайдың әсем табиғатын бейнелейді. Жобаны жүзеге асыруға «ҚТЖ» ҰК» АҚ, Көлік министрлігі, Туризм және спорт министрлігі, Астана мен Ақмола облысы әкімдіктері, сондай-ақ, «Visit Aqmola» мен «Астана даму орталығы» ЖШС бірлесе жұмыс істеді» — делінген хабарламада.
2024 жылы «Қазақстан темір жолы» ұлттық компаниясы Тәуелсіздік күні мен Жаңа жыл мерекесіне орай бірнеше жаңа бағыттар мен қосымша пойыздарды, сондай-ақ электр пойыздарды да іске қосқанын хабарлаған еді.
Желтоқсан айындағы мерекелерді ескере отырып, тасымалдаушы компания жолаушылардың сұранысын қанағаттандыру мақсатында жалпы саны 43 мыңнан астам қосымша орын ұсынды.
Қосымша пойыздар:
- №201/202 «Астана – Алматы» пойызы: әр рейсте шамамен 800 орын бар. Жоспарланған 8 рейс нәтижесінде жалпы 6,400 орын ұсынылады.
- №203/204 «Астана – Шымкент» пойызы: әр рейсте шамамен 800 орынмен 7 рейс арқылы 5,600 орын қамтамасыз етіледі.
- №205/206 «Ақтөбе – Астана» пойызы: әрқайсысында 800 орыннан 8 рейс өткізіліп, 6,400 орын беріледі.
Қосымша электр пойыздары:
- №7553/6811–6812/7556 «Қарағанды – Астана – Бурабай курорты» электр пойызы: әр сапарда 600 орынмен 12 рейс арқылы 7,200 орын бар. Жұма, сенбі және жексенбі күндері қатынайды.
- №7509/6805–6806/7510 «Павлодар – Астана – Бурабай курорты» электр пойызы: әр рейсте 600 орыннан 12 сапар нәтижесінде 7,200 орын беріледі. Аптасына үш рет, яғни жұма, сенбі және жексенбі күндері жолға шығады.
«Қазақстан темір жолы» ұлттық компаниясы баспасөз қызметінің мәліметінше, қосымша пойыздардың барлығында купе және плацкарт вагондары бар.
Cурет: «Қазақстан темір жолы» компаниясының баспасөз қызметі
