Қоғамдық қайырымдылық қордың тең құрылтайшысы және басшысы Перизат Қайратқа қатысты тергеу жалғасып жатыр. Бұл туралы ҚР Қаржылық мониторинг агенттігі хабарлады.
Ол көктемгі су тасқынынан зардап шеккен азаматтарға көмек көрсету үшін халықтың жинаған қаражаты мен Палестина тұрғындарына гуманитарлық қолдау көрсету үшін жиналған 1,7 миллиард теңгеден астам соманы жымқырды деп күдікке ілінді.
Тергеу барысында Перизат Қайраттың қылмыстық жолмен алынған қаражатқа сатып алынған келесі мүліктерін сот санкциялады:
- Астана қаласындағы элиталық тұрғын үй кешендері: «Akbulak Riviera», «Highvill Ishim Gold», «Көк Жайлау», «Sensata Plaza» (тұрақ орындарын қоса алғанда).
- «Vela Village» коттедж қалашығындағы элиталық жылжымайтын мүлік.
- Қымбат көліктер: Mercedes-Benz S450, Mercedes-Benz EQE 500, Lexus LX-600, Haval.
Сонымен қатар, тінту барысында қайырымдылыққа жиналған қаражатқа сатып алынған қымбат техника, әлемдік брендтердің (Cartier, Graff, Rolex, Bulgari, Gucci, Louis Vuitton, Versace, Chopard, Hermes, Dolce & Gabbana, Prada) киім-кешектері, зергерлік бұйымдары мен сөмкелері тәркіленді.
Тәркіленген мүліктер тергеу барысында заттай дәлелдемелер ретінде қолданылады.
ҚР Қылмыстық-процессуалдық кодексінің 201-бабына сәйкес, өзге мәліметтер жарияланбайды.
Перизат Қайрат кім?
Перизат Қайрат – волонтерлік қозғалыс белсендісі және «Biz Birgemiz Qazaqstan» қоғамдық қайырымдылық қорының тең құрылтайшысы әрі басшысы. Ол 1991 жылы Ақтөбе қаласында дүниеге келген. Британдық Nottingham университетін «Бизнес менеджмент» мамандығы бойынша тәмамдаған. 2020 жылы Астана қаласында «Biz Birgemiz Qazaqstan» қорын құрған. Қор әлеуметтік осал топтарға көмек көрсетумен айналысқан.
2024 жылдың қараша айында Қаржылық мониторинг агенттігі Перизат Қайратты көктемгі су тасқынынан зардап шеккен азаматтарға көмек көрсету үшін жиналған 1,5 миллиард теңгеден астам қаражатты жымқырды деген күдікпен тергеуді бастады. Тергеу барысында ол қаражатты жеке мақсаттарына, соның ішінде элиталық жылжымайтын мүлік пен қымбат көліктер сатып алуға жұмсағаны анықталды. Сонымен қатар, 2023 жылдың қарашасында Палестина тұрғындарына гуманитарлық көмек көрсету үшін жиналған 200 миллион теңгеден астам қаражатты да жымқырды деген күдікке ілінді. 2024 жылдың 16 қарашасында Астана қаласының тергеу соты оны екі айға қамауға алу туралы шешім шығарды.
Сурет: Ашық дереккөздерден
