Құрылысшылар одағының төрағасы Талғат Ерғалиев Қазақстанда үй бағасының шаршы метрі кемі 400 мың теңге болады деп болжанып отырғанын айтты. Оның айтуынша, құрылыс материалдарының құны өседі, қымбатшылықтың екінші толқыны басталды. Оған қоса, маман бұған Ресейге салынған санкциялар әсер етуде деп топшылайды.
-Ай сайын пәтерлердің бағасы қымбаттап жатыр. 1 ай бұрын 320 мың болған, қазір 390 теңге, келешекте 400 мыңнан кем болмайды. Қолжетімді баспананы айтып жатырмын, 1-2 класс баспанасы туралы айтып жатқан жоқпыз. Ұлттық статистика бюросының мәліметіне сүйенсек, саладағы жағдайды түсіну үшін елдегі құрылыс материалдарының тауарлық матрицасын қарастыру жеткілікті. Отқа төзімді цементтер мен ерітінділер өндірісі жолға қойылып, қажетті өндірістің 70,1%-ын қамтамасыз етіп отыр. Бетон бұйымдары (98,1%), портландцемент (86,8%), ерітінділер (99,8%), лак-бояу (66%) өнімдері шығарылады. Алайда қазақстандық тауарлар құрамына импорттық қоспалар қажет. Мысалы, ерітінділер мен бояуларға қажетті химиялық заттар елде өндірілмейді, көбінесе Германия, Англия, Франциядан жеткізіледі, — дейді «Қазақстан құрылысшылар одағы» төралқасының төрағасы Талғат Ерғалиев.
Ал Нұр-Сұлтан қаласы Кәсіпкерлер палатасы бизнес өкілдерінің түйткілді мәселелерін жинау үшін жедел штаб құрған. Өйткені мәселе ушығып келеді. Олар жағдай реттелмесе, 30 мыңнан астам құрылысшы жұмысынан айырылып, 600-ден астам құрылысқа қаржы табылмай қалуы мүмкін деп дабыл қағуда. Қауымдастықтың есебінше, құрылысқа қажет материалдар мен құрал-жабдықтардың 60 проценті шетелден келеді. Елде тек бетон, кірпіш қана шығады. Ал жоғары технологиялы материалдар жоқтың қасы дейді мамандар.
Ал Бәсекелестікті қорғау және дамыту агенттігінің төрағасы Серік Жұманғарин Қазақстанда тұрғын үй бағасы қатты қымбаттайды деген болжам жоғын мәлімдеді.
«Үй бағасы қатты өседі деп ойламаймын. Өйткені бұл қалай болғанда да халықтың сатып алу мүмкіншілігіне байланысты», — деді агенттік басшысы Мәжіліс кулуарында журналистердің сауалына жауап беріп.
