Өскемен мен Семей қалаларын жарықтандыруға арналған 4,8 млрд теңге бөлінген жоба толық іске аспай қалды. Бұл туралы Шығыс Қазақстан облысының әкімі Ермек Көшербаев мәлімдеді.
Әкімнің айтуынша, жобаны жүзеге асыру барысында қателіктер орын алған болуы мүмкін. Сондықтан облыс әкімдігі көше шамдарын орнатуды қайтадан қарастыруды көздеп отыр.
«Жоба бойынша Өскемен қаласының бірнеше ауданында шамдарды модернизациялау керек еді. Бұл жоба Семей қаласын да қамтыды. Бірақ толық іске асқан жоқ. Жоба инвесторы мен жұмыс атқарған компания өкілдері айтқанымызды мойындамай, «бәрін орындадық» деді. Сондықтан біз құқықтық органдарға арыз түсірдік. Тергеу жүріп жатыр. Қазір Өскеменде қажетті 20 мың шамның 19500-ін орнына қойдық. Тек 500-і қалды. Менің ойымша, бұл жобаны жаңадан қарастыру керек. Себебі шам орнатсақ та күйіп кете береді. Жобада қателер бар сияқты. Еуропа қайта құру және даму банкімен сөйлесеміз, ол үшін тергеу аяқталсын. Сонымен бірге заң бұзған адамдар жауапқа тартылуы керек», – деді Көшербаев.
Жарықтандыру мәселесін жыл соңына дейін шешеміз деген әкімдік уәдесі
2024 жылдың 4 мамырында ШҚО әкімдігінің ресми сайтында «Өскемендегі жарықтандыру мәселесі жыл соңына дейін шешіледі» тақырыбында ақпарат жарық көрген.
Жобаның мақсаты: «Ескірген 16 мың шамды энергия үнемдейтін жарықдиодты шамдарға ауыстырып, жарықты автоматты түрде басқаратын бірыңғай диспетчерлік орталық құру. Электр қуатын 60%-ға дейін үнемдеу көзделді», – делінген хабарламада.
«2023 жылы Өскеменде қараңғы мезгілде жасанды жарық жетіспейтін учаскелерде 14 жол-көлік оқиғасы тіркелген, 1 адам қаза тауып, 16 адам зардап шеккен», – деп жазды Азаттық ШҚО полиция департаментінің ақпаратына сілтеме жасап.
2023 жылы тұрғындар көшелердің қараңғы екеніне шағымданып, әкімдікке жүгінген. Жоғарыда аталған жоба былтырғы жылдың аяғында аяқталуы керек еді. Алайда жоба биыл да аяқсыз қалып отыр.
Сурет: gov.kz
