«Қазпошта» АҚ ауыл тұрғындарына зейнетақы мен жалақы жеткізу қызметіне жыл сайын 10 миллиард теңге жұмсайды. Мәжіліс отырысында компанияның басқарма төрағасы Әсел Жанасова пошташылардың жалақысын көтеру жоспарда бар екенін мәлімдеді.
Ауылдық жерлерде екінші деңгейлі банктердің филиалы мен банкоматы жеткіліксіз болғандықтан, «Қазпошта» 300 банкомат пен көптеген бөлімше, касса арқылы қаржылық қызмет көрсетеді.
«Пошта қызметі ауыл мен қала арасындағы қантамыр іспетті. Расында, екінші деңгейлі банктер ауыл азаматтарына карта ашқанымен, қажетті инфрақұрылыммен қамтамасыз етпейді. Ал тариф қала және ауыл деп бөлінбейді, бәріне бірдей. Бұл қызметті ұйымдастыру үшін күзет, инкассаторлар, ғимараттар керек. Біз осы жұмысты бұдан ары қарай да дамытамыз. Заңға ұсынылып отырған өзгерістер сол жұмысымызды жүргізуге оң ықпал етеді», – деді Әсел Жанасова.
Алыс аймақтардағы қызметтерді ұйымдастыру үшін күзет, инкассация және ғимараттарды ұстау шығындары талап етіледі. Депутаттар екінші деңгейлі банктерді ауылдарда инфрақұрылыммен қамтамасыз етуге міндеттеу мәселесін көтерді. Олардың сөзінше, банктер «Қазпошта» инфрақұрылымын пайдаланғаны үшін ақы төлеуі қажет.
Бұл туралы депутат Қарақат Әбден де пікір білдірді:
«Екінші деңгейлі банктер өз филиалдарын немесе банкоматтарын ауылды жерлерде ашуға асықпайды. Бірақ ауыл адамдарына қуана-қуана карта ашып беріп, клиенттік базасын кеңейтіп жатыр. Бұл орайда банк инфрақұрылымының қызметі үшін шығындар ауыл тұрғындарының мойнына жүктеліп жатқан жоқ па?» – дейді.
Осыған дейін Мәжіліс депутаты Ерлан Сайыров ауылдардағы пошта қызметі жабылып жатқанын айтып, Үкіметке депутаттық сауал жолдады.
Сауалда «Қазпоштаның» 2022 жылы 33, ал 2023 жылы 13 бөлімшесі жабылғанын хабарлады. Егер бұл үрдіс жалғаса берсе, 900-ге жуық бөлімше жабылуы мүмкін. Депутат шекаралас елді мекендердегі «Қазпошта» бөлімшелерінің жабылуы мемлекеттік саясаттың осы өңірлерде әлсіреуіне әкелуі мүмкін екенін және ұлттық қауіпсіздікке әсер ететінін айтты. Ол мерзімді баспасөз басылымдарын жеткізуді субсидиялауды ұлғайту, ауылдық жерлерді дамыту бағдарламалары аясында «Қазпоштаға» әкімдіктердің қаражатын орналастыру және пошта бөлімшелерін мемлекеттік ғимараттарда өтеусіз негізде орналастыруды ұсынды.
Сайыровтың депутаттық сауалына Прьемер-Министрдің бірінші орынбасары Роман Скляр жауап берді. Оның жауабында ауылдық елді мекендерге мерзімді баспасөзді жеткізу тарифін 17,6 теңгеден 80 теңгеге дейін ұлғайту мәселесі қарастырылып жатқаны айтылған. Сондай-ақ «Қазпошта» арқылы ауылдық аумақтарды дамыту бағдарламаларын қаржыландыру бюджет заңнамасына сәйкес келмейтіні көрсетілген.
Пошта бөлімшелерін әкімдіктер ғимараттарында өтеусіз орналастыру мүмкін емес, өйткені бұл ережелерге қайшы. Ауылдарға зейнетақы жеткізу тарифі 319 теңге болып бекітілген, бірақ бұл тарифті қайта қарауға қажеттілік туындамаған. Жалпы, «Қазпошта» қызметі Үкіметтің бақылауында екенін жеткізген.
Сурет: post.kz
