Бүгін, 4 желтоқсан ҚР Парламент Мәжілісінде жаңа бюджет кодексіне Ұлттық қор қаражатын шектеу, жергілікті бюджет кірісін ұлғайту және мемлекет қаржысына бақылауды күшейту бойынша өзгерістер енгізіліп, Сенат қарауына жіберілді.
Өзгерістерді енгізу кезінде негізгі басымдық қаражатты игеруге емес, нақты нәтижеге қол жеткізуге бағытталды. Шешімдер ЖІӨ-ге, инвестицияларға және бюджетке әсері, яғни экономикаға ықпалы нәтижесінде қабылданады. Жылдық есептерді өткізу барысында кеңейтілген, нақты әрі талданған ақпарат беру талап етіледі.
Квазимемлекеттік секторға бақылау:
- Ұлттық әл-ауқат қорының компанияларынан дивидендтердің кемінде 50%-ын, басқа квазимемлекеттік сектор субъектілерінің таза табысының кемінде 70%-ын бюджетке аудару талабы енгізілді.
- Парламент пен қоғамға квазимемлекеттік сектор кірістері туралы есеп беру міндеттелді.
- Сыртқы қарыз алу лимиті белгіленіп, бұл саланың ашықтығы күшейтілді.
Ұлттық қор қаражатын шектеу:
- Қор қаражаты тек елдегі маңызы бар инфрақұрылым мен нысандарға жұмсалады.
Парламент бақылауы күшейтілді:
- Республика бюджетіне енгізілетін өзгерістер Парламентке хабарланып, жалпы бюджетке парламенттік бақылау күшейтіледі.
Жергілікті бюджеттің кірістерін ұлғайту:
- Айыппұлдар, ШОБ-тен түскен салықтар және цифрлық майнинг, автокөлік құралдарының өтуіне, радиожиілік спектрін пайдалануға төленетін төлемдер жергілікті бюджетке аударылады.
- Шағын және орта бизнестен түсетін корпоративтік табыс салығы мен жеке табыс салығы аудандық деңгейге беріледі.
Облыстық және республикалық маңызы бар қалалар бюджеттерінің өзара қарым-қатынастары реттеледі. Мемлекет қаржысын басқару күшейіп, бюджеттен тыс қорлар мен мемлекеттік басқару секторының қарыздары бойынша ақпарат жинау қарастырылады.
Мемлекеттік органдар салықтық емес түсімдерді бақылап, кірістерді жоспарлау мен есеп беруді жақсартады. Өңірлік бюджеттердегі кірістердің асыра орындалған сомалары инфрақұрылымды жақсартуға – газ, су, электр желілері мен жолдарға жұмсалады.
Сурет: kapital.kz
