Елдегі жол құрылысының қарқынына тұрғындардың көңілі толмайды. «Әділдік және өркендеу» қоғамдық қоры жүргізген әлеуметтік мониторинг нәтижесінде сапа мәселесі басты орында тұрғанын мәлім болды.
5-25 қараша күндері аралығында өткен сауалнамаға еліміздің барлық өңірінен 5681 тұрғын қатысты.
2024 жылы елде 12 мың шақырым трасса мен 2,5 мың шақырым облысаралық және ауданаралық автожолдар жөнделгенімен, респонденттердің 40%-ы ғана жолдардың жақсарғанын айтты.
Мониторингке қатысқандардың 68,5%-ы жол құрылысының қарқынына, ал 70%-дан астамы жөндеу сапасына қанағаттанбайды. Респонденттердің 60%-дан астамы сапасыз жол салдарынан жол апатына түстік деп санайды.
Қазақстандықтар үшін ең өзекті мәселелер:
- сапалы магистральдардың жетіспеушілігі (58%);
- тұрғындардың ауданындағы жолдардың сапасы төмен (46%);
- магистральдарда жарық жоқ және шұңқыр көп (39%);
- жөндеу қарқыны баяу (39%);
- суағарлар жоқ, аудандардағы жолдар жарықтандырылмайды (34% және 31%);
- қар уақтылы күрелмейді әрі көктайғаққа қарсы шаралар жасалмайды (29%);
Жол сапасының нашар болуына әсер ететін негізгі себептер:
- Жемқорлық пен ұрлық (38,83%);
- Жергілікті билік органдарының қызметінде кемшілік көп (17,31%);
- Үкімет тарапынан бақылаудың болмауы (12,2%);
- Жолды күтіп-ұстау жұмысы нашар (11,53%).
Сауалнамаға қатысушылар жол сапасын жақсарту үшін келесі шараларды ұсынды:
- жөндеу жұмысының сапасын арттыру (60%);
- жолақтарды кеңейту (34%);
- заманауи технологияларды енгізу (31%);
- құрылысқа бөлінген қаражатты қадағалауды күшейту.
«Біз қоғам тарапынан жұмыс барысына, мердігерлерге, жол құрылысы мен жөндеу сапасына қоғамдық бақылау орнатуға деген сұраныстың жоғары екенін көріп отырмыз. Қазақстандықтар бұл мәселені шешу үшін мемлекетпен, бизнеспен әріптестікке әзір. Қор белсенділері жағдайды өзгерту үшін ашық бақылау, заманауи технологияларды енгізу және жол жұмыстары кезінде азаматтардың мониторингке белсенді қатысуы керек екеніне сенімді», — деді «Әділдік және өркендеу» қоғамдық қорының директоры Дана Рысмұхамедова.
Көлік министрі Марат Қарабаев шілде айында биыл ел аумағында 12 мың шақырым жолды жөндеу және қайта жаңарту жұмыстарын жоспарлап отырғанын мәлімдеген еді. 8 мың шақырымы — республикалық, 4 мың шақырымы — жергілікті жолдар. Жыл соңына дейін 7 мың шақырым жөнделеді.
Сурет: pexels.com
