2025 жылдың қаңтарында «Ұлттық қор – балаларға» бағдарламасы бойынша кәмелетке толмаған балалардың шотына 100 доллардан астам қаржы түседі. Бұл туралы Ұлттық банк төрағасының орынбасары Әлия Молдабекова мәлімдеді.
Ұлттық банктің мәліметінше, 2023 және 2024 жылдар инвестициялық табыс тұрғысынан табысты болған. Осы жылдың 10 айында Ұлттық қорды басқарудан 5,3 млрд доллар пайда түскен, бұл балалар шотына түсетін соманың былтырғыдан артуына ықпал етеді.
«Төлем қаңтар айында жасалады. Өткен жылы біз әр балаға шамамен 100 доллар аудардық. 2023 және 2024 жылдар инвестициялық кіріс тұрғысынан өте позитивті уақыт болды. Сол себепті келесі жылдың қаңтар айында сома көп болуы мүмкін», – деді Ұлттық банк төрағасының орынбасары.
Бағдарлама аясында Ұлттық қордың инвестициялық кірісінің 50%-ы жыл сайын 18 жасқа дейінгі балалар арасында бөлінеді. Қаржы әр бала 18 жасқа толғаннан кейін ғана мақсатты түрде пайдалана алады.
Қаржыны пайдалану жолдары:
- «Отбасы банк» АҚ – тұрғын үй сатып алу немесе білім алуға.
- «Қазақстан Халық Банкі» АҚ – тек білім алуға.
Еске сала кетейік, бұл жоба 2024 жылдың 1 қаңтарынан бастап іске қосылған. Бағдарламаның операторы ретінде Бірыңғай жинақтаушы зейнетақы қоры бекітілген.
Сурет: ktk.kz
