Сыбайлас жемқорлыққа қарсы іс-қимыл агенттігінің мәліметі бойынша Ақтөбе облысының Мұғалжар аудандық соты «ҚТЖ-Жүк тасымалы» ЖШС «Батыс» филиалы Жем пайдалану локомотив депосының бастығын соттады.
Пара
- Депо бастығы кадрлар жөніндегі делдал-менеджер арқылы адамды тепловоз машинисінің көмекшісі лауазымына орналастыру үшін 1,5 млн теңге көлемінде пара алған.
- Сот үкімі бойынша бастық 3 жыл 6 ай бас бостандығынан айырылды.
Басқалар да жазаланды
- Делдал 1 жыл 6 айға сотталды.
- Пара берген адам мен оның көмекшісі әрқайсысы 3 жылға бас бостандығынан айырылды.
- Сотталғанның барлығының мемлекеттік қызметте және квазимемлекеттік секторда жұмыс істеу құқығы өмір бойына шектелді.
Оқиғаның мән-жайы
Осы оқиғаның толық мән-жайын Ақтөбедегі «Диапазон» басылымы жазған.
26 жастағы Ембі тұрғыны техникалық білім алған соң, депода жұмыс істеуге тырысып, конкурсқа қатысқанымен, өте алмаған. Кейіннен Жем пайдалану локомотив депосында машинист көмекшісі болып істейтін досынан көмек сұраған («ҚТЖ Жүк тасымалы» ЖШС «Батыс» филиалына тиесілі). Досы бұл мәселені кадр бөлімінің маманы арқылы шешуді ұсынып, пара беру жоспарын құрған.
- Кандидатқа алдын ала сұрақтар мен жауаптар дайындалып берілді.
- 1,5 миллион теңгені жинау үшін жас жігіт әйелі арқылы несие рәсімдеген.
- Параны досы арқылы кадр бөліміне жеткізген, ол өз кезегінде ақшаны депо бастығына тапсырған.
Депо бастығы Дәулетқали Жалмұхамбетов сотта параның бір бөлігін, яғни 300 мың теңгені, кадр бөлімі маманы өзіне қалдырғанын айтты. Жалмұхамбетов бұл ақшаны депо ғимаратын жөндеу үшін пайдаланғанын алға тартқан, бірақ бұл оның жазасын жеңілдетпеді.
Сот үкімі әлі заңды күшіне енген жоқ.
Сурет: informburo.kz