БҚО-да құқық қорғау органдары 14,5 тонна прекурсорлар мен химиялық заттарды тәркіледі деп хабарлайды Polisia.kz.
Оралдағы ЖШС-ның бірінің өндірістік цехынан 14,5 тонна химиялық заттар табылды. Тексеру барысында ерекше иісі бар сұйықтық құйылған үш бір тонналық пластикалық ыдыс және алты резервуар тәркіленді. Бұл заттар прекурсорлар мен химиялық элементтер екені белгілі болды.
Сондай-ақ ұйым осыған дейін лицензиясыз жұмыс істеген.
«Осы жағдай бойынша сотқа дейінгі тергеу басталды. Іс-шараның басты мақсаты – есірткі мен химиялық заттардың заңсыз айналымын тоқтату және оның алдын алу. Жедел қызметтің бескүндік жұмысы барысында аймақта есірткі, психотроптық немесе улы заттармен жұмыс істеу ережелерінің бұзылуына байланысты алты қылмыстық іс анықталды. Сонымен қатар 14 әкімшілік іс қозғалып, 14 адам жауапкершілікке тартылды, олардың ішінде 10 медицина қызметкері бар», – деп жазды портал.
Одан бөлек тексеру барысында құрамында есірткі және психотроптық заттар бар 1,5 мың ампула мен 745 таблетка табылған.
Сурет: polisia.kz
