Премьер-министр Олжас Бектенов соңғы кезеңдегі жалпыға бірдей декларациядан бас тарту ұсынысын Үкімет отырысында қолдады.
Ол Қаржы, Ұлттық экономика және Әділет министрліктеріне үш күн ішінде заңнамаға қажетті түзетулер дайындауды тапсырды.
«Президент жаппай декларациялау тәсілдерін қайта қарауды тапсырды. Қазір декларацияны 4 млн-нан аса адам тапсырады. Олардың ішінде мемлекеттік қызметкерлер, квазимемлекеттік сектор мен бизнес өкілдері бар. 2025 жылы азаматтардың қалған барлық санаты да декларация тапсырады деп жоспарланған. Оған халық алаңдаушылық білдірді. Сондықтан аталған мәселеге мемлекет басшысы өзінің назарын аударды. Бүгінгі таңда мемлекеттік органдардың базасы барынша цифрландырылған, қаржылық және валюталық бақылау күшейтілді. Халықаралық келісімдер шеңберінде шоттар бойынша деректер алмасу жолға қойылды. Цифрлық қызметтер көрсету кең таралған», – деді Үкімет басшысы.
Осыған дейін бірінші, екінші, үшіші кезең бойынша декларация тапсырған тұлғалар мен тапсырмағандарға қатысты ескерту жасалған еді. Президент Қасым-Жомарт Тоқаев бүкіл халықтың декларация тапсыруына қатысты Ауыл шаруашылығы еңбеккерлерінің бірінші форумында пікір білдірген еді.
Алайда бір мәселені ескеру қажет. Жаппай декларация тапсыру тұжырымдамасы осыдан 14 жыл бұрын қабылданған. Содан бері елімізде цифрландыру ісі және финтех саласы қарқынды дамып келе жатыр. Түрлі мемлекеттік мекемелерге ортақ мәліметтер базасы пайда болды. Қаржы және салық бақылауы күшейді. Демек осындай ауқымды өзгерістерден кейін төртінші, яғни, соңғы кезеңде азаматтарды декларация тапсыруға міндеттеу қаншалықты орынды деген сұрақ туады. Үкімет бұл мәселені жан-жақты пысықтауы қажет», — деді Тоқаев.
Халықтың барлық санаты декларациядан босатылмайды. Қазақстанннан тыс жерде активтері бар, бір жыл ішінде құны 20 мың АЕК (74 млн теңге) астам сомаға дүние не қызмет түрін сатып алған, дербес салық салынатын табысы бар азаматтарға есеп беруге міндетті.
Декларацияның 4-кезеңіне кімдер қатысуы керек еді?
1 қаңтардан бастап 8 миллион адам (студенттер, үй шаруасындағы әйелдер, зейнеткерлер және басқа санаттар) өздерінің табыстары мен активтері туралы декларация тапсыруға тиіс деп жоспарланған.
Cурет: Астана қаласының әкімдігі
