БҚО-да Капустин Яр және Азғыр ядролық полигонынан зардап шеккен мүгедектігі бар адамдарға мемлекеттен 2 АЕК (2024 жылғы айлық есептік көрсеткіш – 3692 теңге, бұл шамамен 7384 теңге) көлемінде жәрдемақы төленеді. Облыс әкімі Н.Төреғалиев журналистерге сұхбат бергеннен кейін дәл осы ақпарат БАҚ-тарда жарияланды. Бұл деректің анық-қанығына көз жеткізу үшін Бөкей Ордасы ауданы әлеуметтік бағдарламалар бөліміне хабарластық.
2023 жылдың 23 қазанында аудандық мәслихаттың “Бөкей Ордасы ауданының әлеуметтік көмек көрсетудің, оның мөлшерлерін белгілеудің және мұқтаж азаматтардың жекелеген санаттарының тізбесін айқындаудың қағидаларын бекіту туралы” №8-1 шешімі шыққан:
- Бірінші топтағы мүгедектерге, бала кезінен мүгедектерге және мүгедек балаларға ай сайын – 2 АЕК;
- Екінші топтағы мүгедектерге – 1,5 АЕК;
- Үшінші топтағы мүгедектерге – 1 АЕК мөлшерінде белгіленген.
Төлем алатын тұрғындардың жалпы саны мыңнан асады. Аудан бойынша жәрдемақы алатындар саны:
- 1 топ – 44 адам
- 2 топ – 104 адам
- 3 топ 136 адам
Соның ішінде:
- Бала жастан мүгедектегі бар 1 топ – 7 адам
- Бала жастан мүгедегі бар 2 топ – 51 адам
- Бала жастан мүгедектігі бар 3 топ – 47 адам
- 18 жасқа дейінгі мүгедектігі бар – 50 бала. Аудан тұрғындарына бұдан басқа өтемақы төленбейді.
Бүгін, 12 қарашада Орталық коммуникация қызметі ұйымдастырған брифингте облыс әкімі Нариман Төреғалиев Капустин Яр полигонына төленетін төлем респбуликалық бюджетке түсетінін айтты. Экологиялық заң бұзушылықтардың орын алып жатқанына қарамастан Ресеймен келісімді бұзуға қатысты мәселе үкіметаралық деңгейде шешіледі дейді әкім.
“Бұл екі мемлекет арасындағы халықаралық келісім болғандықтан келісімшартта уақыты көрсетіледі. Сол себепті келісімді ерте бұзу немесе тоқтату жөніндегі мәселе үкімет деңгейінде шешіледі”, – деді Төреғалиев.
Журналистердің “Тұрғындар тарапынан шағымдар бола ма?” – деген сауалына:
“Кейде шағымдар болады. Ракетаның қалдықтары түсіп жатыр деген жағдайда, біз тиісті министрліктерге хабарласып, түскен қалдықтарды аяқтай барып, көріп, Ресей Федерациясы тарапын осы жөнінде хабардар қылып отырамыз”, – дейді.
Капустин Яр полигоны – Қазақстанның Ресейге жалға беріп отырған аумағы. Атырау және Батыс Қазақстан облыстарының батыс аймақтары мен Ресей Федерациясының Астрахан, Волгоград облысының шығыс бөліктерін алып жатыр. Бөкей Ордасы ауданына 1 921 445 гектар жер тиесілі болса, соның 943 608 гектар жері полигонға берілген.
Елдегі сол өңірлерге жақын тұратын жергілікті тұрғындар бұқаралық ақпарат құралдарына да, жауапты мамандарға да жиі шағымданады. Себебі полигоннан зардап шеккен адамдарға жәрдемақылардың дұрыс берілмейтінін және ластанып жатқан экологияға сынамалар жасалмайтынын, салдарынан зиянды су, басқа да қалдықтар қалатынын айтады.
Сурет: check–point.kz