Астана қаласының қылмыстық істер жөніндегі ауданаралық соты «LRT» ЖШС-нің бұрынғы басқарма төрағасы Талғат Арданды сырттай тоғыз жылға соттады.
Оған ауыр салдарға алып келген лауазымдық өкілеттіктерін теріс пайдаланды деп айып тағылды.
Сотталушыға халықаралық іздеу жарияланғандықтан, іс оның қатысуынсыз сырттай қаралды. Сот үкімімен Ардан Қылмыстық Кодекстің 361-бабы 4-бөлігінің 3-тармағы бойынша кінәлі деп танылып, 4 жыл 8 айға бас бостандығынан айырылды. ҚК 58-бабының 6-бөлігі бойынша 2023 жылдың 3 мамырында шыққан сот үкімімен тағайындалған жазаны ішінара қосу арқылы мемлекеттік қызметте қызмет атқару құқығынан өмір бойына айырылды.
Сондай-ақ сот сотталушының балалары бар екенін ескеріп, жазаны сәл де болса жеңілдеткен.
Қандай айып тағылды және не үшін?
“2016 жылғы 22 желтоқсанда «LRT» ЖШС-нің бұрынғы басқарма төрағасы А. қызметтің мүдделеріне қайшы лауазымдық өкілеттіктерін теріс пайдалана отырып, нақты қажеттіліксіз LRT құрылыс жобасы бойынша Қытайдың мемлекеттік даму банкінен (бұдан әрі – ҚМДБ) сыртқы қарыздың бірінші траншы ретінде 257,6 млн АҚШ долларын заңсыз сұратқан. Қаражат түскен сәттен бастап олар жоба бойынша пайдаланылмаған” — деп хабарлады аталған соттың баспасөз қызметі.
Ал 2018 жылғы 26 қарашада Қытайдың мемлекеттік даму банкінің қызметі Алматы қаласының мамандандырылған ауданаралық экономикалық сотының шешімімен мәжбүрлі түрде тоқтатылған.
Құрылыс жобасы іске аспағаннан кейін банк қаражаты ЖШС-ға қайтарылмаған және өз мақсатына пайдаланылмаған. Осының салдарынан «City transportation systems» ЖШС 85 млрд теңгеден астам шығынға батты.
«Сотталушы кінәсі куәлар айғағымен, сарапшылар мен мамандардың қорытындыларымен, қылмыстық іс материалдарымен дәлелденген», — делінген хабарламада.
Естеріңізге сала кетейік, былтыр Талғат Ардан жеті жылға бас бостандығынан айырылған. Ол ҚР ҚК 189-бабы 4-бөлігінің 2-тармағы бойынша қылмыс жасағаны үшін кінәлі деп танылды. Сондай-ақ сот оны 262-бап «Ұйымдасқан қылмыстық топ құру және оған басшылық ету» бойынша қылмыс жасағанын дәлелдейтін айғақтардың жоқтығынан ақтады. Ол бұдан былай мемлекеттік қызметте және жоғарыда аталған компанияларда қызмет атқара алмайтыны жарияланған еді.
Осыған дейін Сыбайлас жемқорлыққа қарсы іс-қимыл агенттігі Талғат Арданды БАҚ арқылы жауап алуға шақырғанын жазған едік.
Сурет: alrt.kz
