Батыс Қазақстан облысы бойынша 2024 жылдың 1 қаңтарынан бастап 250 нысанды декларацияны 64 мыңнан астам жеке кәсіпкерлер мен олардың жұбайлары, заңды тұлға басшылары, құрылтайшылары мен қатысушылары, олардың жұбайлары тапсырды. Бұл туралы БҚО Мемлекеттік кірістер департаменті хабарлады.
Жалпыға бірдей декларациялаудың үшінші кезеңі шеңберінде декларацияны тапсыру мерзімі 2024 жылы 16 қыркүйекте аяқталды.
Декларацияны ұсынбаған салық төлеушілерге 2024 жылдың 5 қарашадағы жағдай бойынша 7 мың жеке тұлғаға салық заңнамасында белгіленген мерзімде салық есептілігін ұсынбағаны туралы хабарлама жіберілді. Мұндай салық төлеушілер хабарламаны алған сәттен бастап 30 жұмыс күні ішінде декларация немесе түсініктеме беру арқылы жағдайды реттеуі керек.
Салық кодексінің 118-бабының 1-тармағы бойынша Декларацияны ұсынбаған салық төлеушілерге банк шоттары бойынша шығыс операцияларын тоқтата тұру жөніндегі шаралар қолданылады.
Декларация кезеңдерін еске салсақ:
- 2021 жылы 1 қаңтар – мемлекеттік құрылымда қызмет ететіндер мен олардың жұбайлары;
- 2023 жылы 1 қаңтар – мемлекеттік қызметкерлер, бюджет және квазимемлекеттік секторда істейтіндер мен жұбайлары;
- 2024 жылы 1 қаңтар – бизнесмендер — басшылар, құрылтайшылар мен заңды тұлға қатысушылары мен жұбайлары, ЖК иелері мен жұбайлары;
- 2025 жылы 1 қаңтар – қалған санаттағы Қазақстан азаматтары;
Декларация екі нысан бойынша іске асады:
250 нысан – Активтер мен міндеттемелер туралы декларация
270 нысан – Кірістері мен мүлкі туралы декларация
Қазақстан бойынша 3-кезеңде қанша адам декларация тапсырды?
Қаржы министрлігі Мемлекеттік кірістер комитетінің жеке тұлғалардың табыстарын әкімшілендіру басқармасының бас сарапшысы Ерсайын Көптілеуұлының айтуынша, биыл 10 айдың ішінде 2,1 млн адам табысын көрсетіп, декларация тапсырған. Егер тұлғалар декларация өткізбеген жағдайда, әкімшілік жауапкершілікке тартылады. Бірінші рет – ескерту жасалады, екінші рет – айыппұл салынады.
Декларацияда қандай мәліметтер көрсету керек?
- шетелдегі жылжымайтын мүлік және көлік;
- шетелдік банктегі 3,5 млн теңгеден жоғары (1 000 АЕК) ақша;
- шетелдік компаниядағы қатысу үлесі;
- бағалы қағаздар, цифрлық активтер (биткоиндер және т. б.);
- үлестік қатысу шарты (тұрғын ғимараттағы үлесі);
- инвестициялық алтын (құйма алтын);
- зияткерлік меншік және авторлық құқық объектілері;
- 34,5 млн. теңге (10 000 АЕК) шегінде қолма-қол ақша;
- басқа тұлғалармен нотариалды куәландырылған қарыз шарттары.
- құны 3,5 млн. теңгеден асатын басқа да мүлік (қалауы бойынша) (мәдени құндылықтар, зергерлік бұйымдар, асыл тұқымды жануарлар және т. б.)
Декларация тапсырудың негізгі мақсаты – көлеңкелі экономиканы болдырмау, жемқорлықты жою және әділ салық салуды қамтамасыз ету.
Сурет: nur.kz