Қаржылық мониторинг агенттігі Ақтөбе облысында «World Business Consulting» атауымен қаржы (инвестициялық) пирамидасын құру және оның құрылымдық бөлімшесін басқару фактісі бойынша сотқа дейінгі тергеуді аяқтады.
Белгілі болғаны, қаржы пирамидасының өкілдері өздерін Қазақстанда ресми тіркелген халықаралық инвестициялық компания өкілдері ретінде таныстырып, Ақтөбеде презентациялар өткізген.
«Жиындарда күдіктілер қаржылық инвестициялар, тиімді пайызбен несие рәсімдеу, әлемнің кез-келген жерінен пәтер және жаңа көлік сатып алу жайлы ақпараттармен азаматтарды қызықтырған. Осы арқылы жаңа салымшыларды тартып, оларға ай сайын ақша салып одан сыйақы алатынына сендірген. Күдіктілердің заңсыз әрекетінен 60 млн теңгеге жуық шығын келтірілді. Сот үкімімен екі азамат кінәлі деп танылып, бес жылға шартты түрде бас бостандығынан айырылды», — делінген хабарламада.
Агенттіктің мәліметінше, жәбірленушілерге келтірілген залал толық көлемде өтелді.
Жыл басталғалы қаржы пирамидаларын құру және басқару фактілеріне қатысты 62 қылмыстық іс аяқталды
ҚМА-ның хабарлауынша, жыл басынан бері қаржы пирамидаларын құру және басқару фактілері бойынша 62 қылмыстық іс аяқталды. Жалпы ұйымдастырушылар 20 млрд теңгеге жуық шығын келтіріп отыр.
Бүгінгі таңда 13 млрд теңгеден астам қаражат өтелді. Сондай-ақ қаржы пирамидаларының қызметін ұйымдастырғаны және жарнамалағаны үшін 53 адамға қатысты 35 сот үкімі шықты. Олар екі жылдан тоғыз жылға дейінгі мерзімге сотталды.
«Қаржы пирамидаларының белгілері бар 10,7 мың сайт пен сілтеме бұғаттауға жолданды. WhatsApp, Telegram және Instagram-да 300-ге жуық чат бұғатталды. Осылайша, 2 миллионнан астам әлеуетті салымшының қаржылық шығынға ұшырауына жол берілмеді. «Қаржы пирамидаларына қарсы іс-қимыл» арнайы жобасы жүзеге асырыла бастағаннан бері «Qnet», «World Business Consulting», «Finiko» «Antares»/«Antares Trade», «Sincere Systems Group»/«S-Group», «Hermes LTD», «Life is good», «Chia Tai Tianding»/«Chia Tai Pharmaceutical» «Energy Eolus Oazqstan»/«Eolus» сияқты елде жұмыс істейтін қаржы пирамидаларының құрылымдық бөлімшелерінің ұйымдастырушылары жауапкершілікке тартылды», — деп мәлімдеді Қаржылық мониторинг агенттігі.
Сурет: Қаржылық мониторинг агенттігі
