Теракт 23 қазанда Түркияның Анкара қаласында «Anka» ұшқышсыз ұшақтары жасалып, «F-16» ұшағы модернизацияланатын «Tusaş» түрік әуекомпаниясы ғимаратының кіреберісінде болды.
Объекттер алдында атыс пен жарылыстар естілген. Ресми дерекке сүйенсек, қазірге дейін бес адам қаза тапқан. Олардың арасында бақылау-өткізу бекетінде отырған күзетші де бар. Сондай-ақ 22 адам жарақат алған.
Сол күні оқиғаға қатысты Ішкі істер министрі Али Ерликая бірден мәлімдеме жасады.
«Анкараның Кахраманказан нысандарына теракт жасалды. Өкінішке орай, құрбан болғандар мен жараланғандар бар. Алла рахымына алсын», – деді ол.
Лаңкестік әрекеттен кейін оқиға орнына жедел жәрдем, өрт сөндіру қызметі және қауіпсіздік тобы барған.
«Біздің бағалауымызша, шабуыл Күрдістан жұмысшы партиясының әрекетімен байланысты болуы мүмкін. Шабуылдаушыларды анықтағаннан кейін біз ақпарат және басқа да дәлелдермен бөлісеміз», – деді Түркияның Ішкі істер министрі.
Сондай-ақ министр екі лаңкестің (әйел және ер адам) көзі жойылғанын растады.
Түркия президенті Режеп Тайип Ердоған шабуылдың бейбіт тұрғындарға бағытталғанын және лаңкестік сипатқа ие екенін мәлімдеді.
Түркиядағы терактіде зардап шеккен қазақстандықтар жоқ. Бұл туралы бүгін СІМ ресми өкілі Айбек Смадияров мәлім етті.
«Қаза болғандар мен зардап шеккендердің арасында біздің азаматтар жоқ», – деді ол.
Сурет: bbcturkce