Қаржы министрлігінің Мемлекеттік кірістер комитеті «Электрондық шот-фактуралар» ақпараттық жүйесінде шарттарды ресімдеу жөніндегі пилоттық жобаны іске асыру қағидаларын бекіту туралы» ҚР ҚМ бұйрығының жобасын әзірледі. Құжат бойынша өнім беруші мен қосалқы мердігер электронды келісімшарт арқылы жұмыс істеуге міндетті болады.
«Бұл пилоттық жоба өнім беруші мен ол тартқан қосалқы мердігер арасында Мемлекеттік сатып алу туралы шартта көзделген жұмыстың не көрсетілетін қызметтердің бір бөлігін орындауға жасалатын ЭШФ АЖ-да электрондық шарттарды ресімдеуді (енгізуді) көздейді. Сондай-ақ, бұл пилот контрагенттермен өзара әрекеттесуді толығымен электронды түрге ауыстыруға мүмкіндік береді. Электрондық шарттарды пилоттық қолдану ерікті негізде көзделген», – деп хабарлады Қаржы министрлігі.
Бұл тетік ЭШФ АЖ-ға шарттарды енгізуге арналған мәмілелер бойынша негізгі құжат айналымын мемлекеттің бақылауына алуға ықпал етеді. Оған қоса салық төлеушілердің контрагенттермен өзара іс-қимылын толығымен электрондық нысанға көшіруге, сол арқылы камералды бақылау мен тәуекелдерді басқару жүйесін жетілдіру жолымен салықтық әкімшілендірудің тиімділігін арттыруға мүмкіндік береді.
Аталған бұйрық жобасы Ашық НҚА порталында 2024 жылдың 18 қазанында орналастырылған.
Бұйрық жобасын қоғамдық талқылау мерзімі – 2024 жылдың 4 қарашасына дейін.
Сурет: freepik.com
