Қыркүйекте елде жылдық инфляция баяулап, 8,3%-ды (тамызда – 8,4%) құрады. Жылдық инфляцияның баяулауы он бір өңірде тіркелді. Сондай-ақ инфляция жеті өңірде жеделдеп, екі өңірде өзгеріссіз қалды.
Ұлттық банктің дерегінше жылдық инфляцияның ең жоғары мәні Астана қаласы мен Маңғыстау облысында тіркелді.
«Қыркүйекте азық-түлік тауарларының бағасы ж/ж 5,1%-ға дейін (тамызда – 5,5%) баяулады. Осы топтағы тауарлар бағасының ең жоғары өсімі Алматы қаласында (7,7%), ал ең төмені Астана қаласында (2,1%) қалыптасты. Азық-түлікке жатпайын тауарлар бағасының өсу қарқыны ж/ж 7,6%-ға дейін (тамызда – 7,7%) баяулады. Ең жоғарғы мәні Түркістан облысында (13,3%), ең төменгі мәні Жетісу облысында (4,9%) тіркелді.
Ақылы көрсетілетін қызметтердің бағасы қыркүйекте бұрынғы деңгейде ж/ж 13,6% (тамызда – 13,6%) сақталды. Сонымен қатар бағалар жалпы республикалық деңгейден Павлодар облысында (20,0%) біршама жоғары, Алматы облысында (7,7%) төмен өсті», — делінген Ұлттық банктің хабарламасында.
Айтып өтелік, қыркүйекте ел бойынша бір айдағы инфляцияның өсуі 0,4%-ды құрады. Бұл тарихи орташа деңгейден (2017-2021 ж.ж қыркүйекте – 0,3%) жоғары.
Жалпы инфляция деңгейін сипаттайтын тұтыну бағалары индексінің көрсеткіші ай сайын есептеледі.Бақылаулар қызметтер мен тауарлардың тарифтері мен бағалары – барлығы 508 позиция бойынша жүргізіледі.
Осы жылғы қаңтардан бастап тұтыну бағаларының индексін есептегенде азық–түлік тауарларының үлесі – 42,0%, азық-түлік емес тауарлар – 29,8%, ақылы қызметтер 28,2%-ды құрады.
Жалпы Қазақстанда жылдық инфляцияның үш ай қатарынан төмендегені байқалады. Шілдеде жылдық инфляция 8,6%-ды құраса, тамыздағы көрсеткіш – 8,4%-ды, қыркүйекте – 8,3%-ға дейін баяулады.
Сурет: freepik.com
