Осы жылдың қаңтар-маусымында Қазақстан 494,1 млн АҚШ долларына 2,4 млн тонна бидай мен меслин экспорттады. Оның жалпы көлемінен негізгі үлесі – Өзбекстан, Тәжікстан, Түрікменстан, Қытай, Ауғанстанға тиесілі.
Бүгінгі таңда қазақстандық аграршылар 19,2 млн тонна бидай жинаған. Ұн тарту саласында жалпы қуаттылығы жылына 9,1 млн тонна астық өндіретін 270-ке жуық кәсіпорын іске қосылды.
Отандық ұн өндірісінің көлемі елдің ішкі тұтынуынан екі есе дерлік асып түседі және экспорттық жеткізілім көлемі бойынша әлемде жетекші орынға ие.
«Биыл сегіз айда екі миллион тоннадан астам ұн өндірілді. Нан өндірісі еліміздің ішкі нарығын толық қамтамасыз етеді. Нан өндірушілер халықтың нанға деген қажеттілігін қанағаттандырумен қатар, нарықтағы сұранысқа байланысты шығарылатын өнім ассортиментін кеңейту бойынша да белсенді жұмыс істеп жатыр. Бұл негізінен – нан-тоқаш, кондитерлік өнімдер, қысқа және ұзақ сақталатын ұннан жасалған өнімдер.
Сегіз айда 329 мың тонна нан өндірілді. ҚР агроөнеркәсіптік кешенін дамытудың 2021-2030 жылдарға арналған тұжырымдамасы шеңберінде астық өңдеу саласының бәсекеге қабілеттілігін арттыру үшін ауыл шаруашылығы өнімдерін өңдеумен айналысатын АӨК субъектілері (оның ішінде ұн және нан өндірушілер) үшін айналым қаражатын толықтыруға жеңілдігі бар кредиттер берумен мемлекеттік қолдау шаралары көзделеді», – деп хабарлады Ауыл шаруашылығы министрлігі.
Осы жылы астық өнімі кем дегенде 20 млн тоннаға жетеді деп күтіліп отыр
Айтып өтелік, 2023 жылдың қаңтар-қарашасында Қазақстан 1,7 млрд АҚШ долларына 6,7 млн тонна бидай мен меслин экспорттады. Өнімнің басым бөлігі дәстүрлі түрде ТМД елдеріне жөнелтілген.
Ресми дерекке сүйенсек, биылғы астық өнімі кем дегенде 20 млн тоннаға жетеді деп күтіліп отыр. Астық экспортының негізгі үлесі, яғни 40-45%-ы көршілес Орталық Азия елдерінің нарықтарына теміржол арқылы жөнелтіледі.
Биыл Қазақстан бидай мен ұннан таршылық көрмейді. Бүгінде жиналған бидайдың 70%-ы сапалы. Бұл туралы жақында Ауыл шаруашылығы вице-министрі Ермек Кенжеханұлы айтқан еді. Сондай-ақ министрдің орынбасары ұнның бағасын нарықтағы сұраныс анықтайтынын атап өтті.
2023 жылдың 16 қазанынан бері Дүниежүзілік нан күні атап өтіледі. Бұл – 2006 жылы Халықаралық наубайшылар мен кондитерлер одағының бастамасы бойынша құрылған мереке. 2019 жылдан бастап атаулы күн Қазақстанда да атап өтіледі.
Сурет: freepik.com
