Шілде айында Сыбайлас жемқорлыққа қарсы іс-қимыл агенттігі Талғат Арданды БАҚ арқылы жауап алуға шақырған еді. Бірақ күдікті жауап беруге уақытында келмеген.
Антикор «Astana LRT» ЖШС-ның бұрынғы басқарма төрағасы Талғат Ардан мен «Астана Банк» АҚ-ның бұрынғы негізгі акционері Олжас Тоқтаровқа қатысты қылмыстық істерді сотқа жіберді. Бұл жөнінде Сыбайлас жемқорлыққа қарсы іс-қимыл агенттігінің ресми өкілі Данияр Бигайдаров мәлімдеді.
«Сыбайлас жемқорлыққа қарсы іс-қимыл агенттігі «Astana LRT» ЖШС-ның бұрынғы басқарма төрағасына қатысты қылмыстық істі тергеуді аяқтады. Біз Қылмыстық кодекстің 208-бабы және 205-бабының 1-бөліміне сәйкес елге жауап алуға шақырдық. Олар келген жоқ. Қылмыстық істі жасаған кездегі дәлелдер толықтай табылды. Іс 19 қыркүйекте сотқа жолданды», — деді Данияр Бигайдаров агенттікте өткен баспасөз мәслихатында.
Сондай-ақ Антикор өкілі тиісті шешім қабылданатынын айтты. Белгілі болғаны, Талған Ардан Қазақстан аумағында емес.
Қазір Астана қаласында біраз жылдан бері құрылысы аяқталмай тұрған LRT «жемқорлық ескерткіші» деп аталып кеткен. Өткен айда құрылыста тіректерді тұрғызу жұмысы 100% аяқталғаны белгілі болды.
2020 жылы құрылыс кезінде болған ұрлықтарға қатысты тергеу басталды. Кейін сот процесі жүргізілді. 2021 жылы Талғат Ардан мен Қанат Сұлтанбековке іздеу жарияланды.
Сонымен қатар сол жылы жеті айыпталушы жетіден он жылға дейін бас бостандығынан айырылып, оларға 5,8 миллиард теңге көлемінде шығынды өтеу міндеттелді.
Сурет: antikornews
