2024 жылдың алғашқы сегіз айында туризм саласында негізгі капиталға салынған инвестиция көлемі 527,6 млрд теңгеге жетті. Бұл өткен жылдың сәйкес кезеңімен салыстырғанда 69%-ға көп. 2023 жылдың алғашқы сегіз айында инвестициялар 311,8 млрд теңгені құраған.
Жыл соңына дейін елімізде 148 инвестициялық жобаны жүзеге асыру жоспарланған. Туризм индустриясы комитетінің дерегінше, бұл өз кезегінде өңірлерде шамамен 2,5 мың жаңа жұмыс орнын ашуға мүмкіндік береді. Аталған бастамалар туристік инфрақұрылымды жақсартуға және туристерді көбірек тартуға бағытталған.
«Туристік секторға салынған инвестициялардың өсуі стратегиялық маңызды саланы дамытуға қызығушылықтың артқанын көрсетеді. Туристік бағыттарды қажетті инфрақұрылыммен қамтамасыз ету арқылы Қазақстанды шетелдік және ішкі туристер үшін тартымды ете аламыз», – деді Туризм индустриясы комитетінің төрағасы Нұртас Кәріпбаев.
Биыл 64 инфрақұрылымдық жоба жүзеге асырылып жатыр. Бұл да туристік саланы дамытуға және туристерге қолайлы жағдай жасауға мүмкіндік бермек.
Ресми мәліметке сүйенсек, Қазақстан жаһандық туризм рейтингінде 14 сатыға көтерілген.
Дүниежүзілік экономикалық форумның (World Economic Forum) Саяхат пен туризмді дамыту индексіне сәйкес, Қазақстан туристік бағыттар тізімінде 119 ел арасынан 52-орынды иеленді.
Жасыратыны жоқ еліміздің географиялық тұрғыдан оңтайлы орналасқанына, алуан түрлі табиғатымыз, бай әрі бірегей тарихи-мәдени мұрамыз бар екеніне қарамастан, туризм саласындағы әлеуеттің толық пайдаланылмай отырғаны рас.
Соңғы төрт жылда экономика құрылымындағы туризмнің үлесі 3,7 пайыздан 3,2 пайызға дейін азайып кеткен. Бұл әлемдегі орташа көрсеткіштен үш есе төмен.
Ал әлемдік жалпы өнімдегі туризмнің үлесі 9 пайыздан асты. Дүниежүзіндегі жұмыс орындарының шамамен 10 пайызы туризмге тиесілі. Әрбір төртінші жұмыс орны осы салада ашылып жатыр.
Көрсетілетін қызметтер бойынша әлемдік экспорттың 30 пайызы, инвестицияның 7 пайызы және салық түсімдерінің 5 пайызы туризм арқылы түседі.
Сурет: freepik.com
