Бүгін Үкімет отырысында Батыс Қазақстан облысының әкімі Нариман Төреғалиев өңірде су тасқынынан зардап шеккендерге өтемақы төлеу және қалпына келтіру жұмысының толық аяқталғанын айтты.
Облыста жалпы сомасы 3,6 млрд теңгеге 9 994 отбасы біржолғы төлем алған. 10 222 отбасына 3,7 млрд теңгеге материалдық өтемақы төленген.
Зардап шеккен үйлерді жөндеуге 4,3 млрд теңге бөлініп, 42,3 млрд теңгеге 2 015 пәтер сатып алынған және 775 жаңа тұрғын үй салынған.
Құрылыс жұмысына 60-тан астам жергілікті компания мен екі мыңға жуық адам жұмылдырылды.
Сонымен қатар Сырым ауданында алдында жүргізілген техникалық тексеру нәтижесінде жөндеуге жатқызылған бірқатар тұрғын үйде уақыт өте келе іргетастары шөгіп, қабырғаларында жарықтар пайда болды. Әкім тұрғындардың өтініштері негізінде қайта техникалық тексеру жүргізіліп, тағы 38 жаңа тұрғын үй салу туралы шешім қабылданғанын хабарлады.
Құрылыс жұмысы 3 қыркүйекте басталған және биылғы 15 қазанға дейін аяқталмақ.
Әкімнің сөзіне сүйенсек, бұдан бөлек, Орал қаласында қайталама нарықта пәтер сатып алу бойынша жұмысты ұйымдастыру барысында көпбалалы отбасылардан жеке тұрғын үйлер салу бойынша өтініштер түсті. Осыған байланысты, қысқа мерзімде Орал қаласының Деркөл кентінде 28 қосымша тұрғын үйдің құрылысы басталды. Құрылыс 1 қазанға дейін аяқталады.
Сонымен бірге тасқыннан кейін жол учаскелері мен зардап шеккен объектілерді, инфрақұрылымды қалпына келтіру жұмысы жүрді.
Жалпы облыс бойынша су тасқыны салдарын қалпына келтіруге барлық көздерден 100 млрд теңге бөлінген.
Қазақстанда су тасқынынан зардап шеккендерге арналған 2 576 үйдің құрылысы аяқталды
Өнеркәсіп және құрылыс министрі Қанат Шарлапаев су тасқынынан зардап шеккен қазақстандықтарға арналған 2 576 үйдің құрылысы аяқталғанын мәлімдеді. Жалпы құрылыс мамыр айының соңында басталып, төрт ай ішінде аяқталып отыр.
Солтүстік Қазақстан, Ақтөбе, Қостанай және Атырау облыстарында су тасқынынан зардап шеккендерге арналған үйлердің құрылысы 100% аяқталды. Құрлыс Ақмола (38 үй) және Батыс Қазақстан өңірлерінде (66 үй) жалғасып жатыр.
Айтып өтелік, көктемгі су тасқыны салдарынан Қазақстанда барлығы 17 603 үй зардап шекті, оның 8 447-сі кейіннен апатты деп танылды.
Мемлекет жаңа үйлер салудан бөлек, қайталама нарықта 5 767 бірлік тұрғын үй сатып алды.
Сонымен қатар Премьер-Министрдің орынбасары Қанат Бозымбаев су тасқынынан зардап шеккен 34 мыңнан астам отбасы жалпы сомасы 12,6 млрд теңгеге 100 АЕК мөлшерінде біржолғы төлем алғанын айтты.
Вице-премьердің сөзінше, биылғы су тасқыны 120 мыңнан астам адамның өміріне әсер еткен.
Сурет: primeminister.kz
