Алматыда өз-өзіне қол жұмсаған екі жасөспірімнің телефонынан суицидке итермелейтін ойындар табылмады. Бұл жайында Ішкі істер министрлігінен мәлімдеді.
«Алматыда суицид жасаған екі жасөспірімге қатысты олардың телефондарына тексеру жүргізілгенін хабарлаймыз. Суицидке итермелейтін ойындарға қатысу фактісі анықталған жоқ. Қазіргі уақытта өшірілген жазбалар мен қосымшаларды қалпына келтіру үшін телефондарға қосымша зерттеу жүргізіліп жатыр», — деп атап өтті министрліктің баспасөз қызметі.
Сондай-ақ министрлік ел азаматтарының суицидке бағытталған интернет ойындарға қатысуы да анықталмағандығын алға тартады.
Еске салсақ, Алматыда екі жасөспірім қыз көпқабатты үйден құлап, оқиға орнында көз жұмды. Желіде тараған ақпаратты Алматы қаласы Полиция департаменті растады. Кейін оқиғаға қатысты қылмыстық іс қозғалғаны хабарланды.
Осыдан бірнеше күн бұрын Алматыда тағы бір жасөспірім қыздың 13 қабаттан құлап қайтыс болғаны айтылды. Бұл деректі де Алматы қалалық полиция департаменті растады.
Бүгін Оқу-ағарту миниcтрлігі осы аптада әр мектепте ұстаздар мен ата-аналар бала қауіпсіздігін талқылайтынын хабарлады.
«23-27 қыркүйек аралығында еліміздің барлық мектептерінде балалардың қауіпсіздігіне арналған ата-аналар жиналысы өтеді. Онда ата-аналардың бала өміріндегі, сондай-ақ онлайн кеңістіктегі қауіпсіздігіне қатысты жауапкершілігі туралы сөз қозғалады», — деп мәлімдеді министрліктен.
Айтып өтелік, ІІМ мәліметтері бойынша, балалар арасында суицид жасаушылардың орташа жасы 15-17 жасты құрайды, алайда одан да ерте, яғни 11-13 жастағылар арасында да осы жағдай жиі кездеседі.
Сонымен қатар аталған министрліктің дерегіне сүйенсек, балалардың терезеден құлау оқиғалары көбейген. Мұндай факт соңғы үш жылда 1,6 есеге артқан. Мәселен, биыл алты ай ішінде елде 223 бала терезеден құлап, оның 12-сі көз жұмған.
Сурет: pixabay.com
