ҰҚК, ІІМ және БП ведомствоаралық жедел-тергеу тобы Астана, Алматы және Шымкент қалаларында, сондай-ақ Ақтөбе, Атырау, Алматы, Жетісу, Батыс Қазақстан және Павлодар облыстарында тұрақты ұйымдасқан қылмыстық топтың мүшелерін ұстауға арналған операция жүргізді. Бұл жөнінде Ұлттық қауіпсіздік комитетінің баспасөз қызметі мәлімдеді.
«Барлығы 50 адам ұсталып, ішкі істер органдарына жеткізілді. Оларға қатысты тергеу жүргізіліп жатыр. Топ мүшелері тауарлар мен автокөліктерді аса ірі көлемде ұрлау арнасын ұйымдастырды, сондай-ақ ұйымдасқан қылмысты қаржыландырды деген күдікке ілініп отыр», — делінген хабарламада.
Күдіктілер 20-дан астам адамның сеніміне кіріп, екі млрд теңгеден аса мүлікті тонаған. Топтың нақты иерархиясы мен қатысушыларының рөлдерінің бөлінуі болған. Аталған топ қылмыс пен деструктивті діни ортаның өкілдерінен, соның ішінде түзеу мекемесінде жазасын өтеушілерден құралған.
«Тінту барысында банк карталары, ірі ақша қаражаты, экстремистік әдебиеттер, ақша аударымдары жазылған жазбалар және тергеу үшін қызығушылық тудыратын өзге де заттар табылды. Қылмыстық-процестік кодекстің 201-бабы 1-бөлігіне сәйкес өзге ақпарат жария етуге жатпайды», — деп хабарлады министрліктен.
Ресми мәліметтерге сүйенсек, биыл 36 ұйымдасқан қылмыстық топтың қызметі тоқтатылған. Оның үшеуі – трансұлттық топтар. Сондай-ақ қылмыстық кодекстің әртүрлі баптары бойынша 150-ден астам криминалитет өкілдері жауапқа тартылды.
ІІМ мен Қаржы мониторингі агенттігі ұйымдасқан қылмыстық топтарды қаржыландыруға және көлеңкелі экономикаға қарсы шаралар қабылдайды. Нәтижесінде мемлекетке 11 млрд теңгеден астам залал келтірген құқық бұзушылықтар анықталған.
Жыл ішінде 12,5 мың литр және шамамен екі млн бума акцизсіз өнімдер, бес тоннадан астам балық және бес мыңнан астам ақбөкен дериваттары тәркіленді. Құрамында алтыны бар материалдарды қайта өңдеу бойынша 19 заңсыз цех жойылып, ондаған тоннадан астам кен табылды.
Сонымен қатар мектеп, колледж және жоғары оқу орындары жастарынан ақша бопсалап, бұзақылық жасаған және қару сақтаумен айналысқан 19 топтың жолы кесілген.
