Ел тұрғындары мен шетелдіктерді тұрғын үйге жалған тіркеу фактілері республикалық маңызы бар үш қалада жиі анықталып отыр.
«Жалпы еліміз бойынша 1 348 «резеңке» пәтер анықталды. Онда 36 мыңға жуық адам тіркелген. Тіркеусіз тұрғаны үшін 200 мыңнан астам адам әкімшілік жауапкершілікке тартылды», — дейді ІІМ Көші-қон қызметі комитетінің төрағасы Аслан Аталықов.
Бір үйде «мың» адам тұрады
Комитет басшысы жалған тіркеу үшін әкімшілік қана емес, қылмыстық жауапкершілік те болуы мүмкін екенін еске салды.
«Астана тұрғыны мыңға жуық азаматты тұрғын үйіне тіркеген. Сол арқылы заңсыз көші-қонды заңдастыру мен ұйымдастыру түрімен айналысқан. Пәтер иесі қылмыстық жауапкершілікке тартылды», — деді полиция полковнигі.
Қоса өтсек, биылғы наурыз айында Алматы облысының ауылындағы бір тұрғынның үйінде 300 шетелдіктің тіркелгені әшкереленген болатын.
Полиция заңсыз миграцияны ұйымдастыру туралы қылмыстық іс қозғады. Сонымен қатар Алматы облысында мұндай 13 мың факті анықталды.
Биылғы мамырда прокурорлар «резеңке» үйлер деп аталатын жалған адрестер бойынша тіркелген 22 мың шетелдікті тапты.
Сурет: ОКҚ
