«Қорғас–Шығыс қақпасы» арнайы экономикалық аймағында жаңа жүк-жолаушылар әуежайы салынады.
«Германияның федералды канцлері Олаф Шольцтың Қазақстанға ресми сапары аясында Көлік министрлігі мен «SKYHANSA» компаниясы арасында «Қорғас–Шығыс қақпасы» арнайы экономикалық аймағында жүк-жолаушылар әуежайын салу жобасын іске асыру туралы келісім жасалды. Құжатқа Көлік вице-министрі Талғат Ластаев және «SKYHANSA» басқарушы серіктесі Юрген Грецбах қол қойды», – деп мәлімдеді Көлік министрлігінің баспасөз қызметі.
Жоба қуаты сағатына 500 адамға дейін баратын жолаушылар терминалы бар әуежай инфрақұрылымын, сыйымдылығы жылына 550 000 тоннаға дейінгі отын қоймасын, жылына 250 000 тоннаға дейін жүктерді толық өңдейтін жүк терминалын салудың, әуе кемелеріне қызмет көрсету үшін авиациялық-техникалық орталық құрудың, сондай-ақ басқа да туристік және сауда-ойын-сауық қызметтерін дамытудың үш кезеңдік бағдарламасын көздейді.
Сондай-ақ, жоба аясында 300-ден астам тұрақты жұмыс орны құрылады деп күтіліп отыр.
Бүгінгі таңда Жетісу облысының әкімдігі әуежай салу үшін жер телімін бөлген. Инвестор инвестициялар туралы келісім жасалғаннан кейін жобаны іске асыруға кіріседі.
Жалпы Жетісу облысының транзиттік әлеуеті жоғары екені белгілі. Қытай мен Оңтүстік-Шығыс Азиядан ТМД елдері мен Еуропаға дейінгі маңызды маршруттардың қиылысында «Қорғас–Шығыс қақпасы» АЭА орналасқан, оның құрамына Құрғақ порт, жалпы ауданы бес мың гектарға жуық логистикалық және индустриялық аймақтар кіреді.
Сурет: freepik.com
