Қазақстанда қылмыстық және әкімшілік жауапкершілікке тартылған 15 мың адам амнистияға ілінуі мүмкін. Бұл туралы ҚР Ішкі істер министрлігі хабарлады.
Қазақстанда әкімшілік құқық бұзушылық істеріне қатысты амнистия алғаш рет өткізілмек. ІІМ дерегінше, бұл шара жалпы құны 17 млрд теңге болатын 1 миллион әкімшілік айыппұлдың күшін жояды.
«Амнистия арқылы 15 мыңнан астам адам жазадан босатылуы мүмкін. Оның ішінде 1,5 мың азамат жазасын түзеу мекемелерінде өтеп жатыр. Терроризм, экстремизм, сыбайлас жемқорлық, ұйымдасқан қылмыстық топ құрамында жасалған құқық бұзушылықтар, азаптау, жыныстық зорлық-зомбылыққа қатысты қылмыс жасағандар мен қайта құқық бұзғандар амнистияға ілікпейді», – деді ІІМ Заң қызметі және нормашығармашылық қызметті үйлестіру департаменті бастығының орынбасары Ермек Шүлден.
Құжат қылмыстық теріс қылық көрсеткен не келтірілген залалды толық өтегендерге қатысты қолданылады. Бұдан бөлек сотталғандардың мінез-құлқы мен қылмыстың ауырлығына қарай жаза мерзімін қысқарту қарастырылған.
Заң жобасы парламент мәжілісінің қарауында жатыр.
фото: istockphoto.com
